Дьокуускай куорат «Патриот» киинигэр бүгүн олус долгутуулаах уонна үөрүүлээх күн буолла. Биһиги доҕотторбут, академик Л. В. Киренскэй аатынан Амма лиссиэйин үөрэнээччилэрэ— лётчик-космонавт В. Ф. Быковский аатынан юнармейскай этэрээт чилиэннэрэ — «Юнармейскай килбиэн» (Юнармейская доблесть) III степенин мэтээллэринэн наҕараадаланнылар!
Бу наҕараада күүстээх үлэ, дьаныардаах дьарык түмүгэ буолар. Өйдүүгүт, аҕыйах кэмнээҕитэ 2025 сыл, атырдьах ыйыгар Челябинскай куоракка «Юнавиа» диэн Бүтүн Россиятааҕы олус улахан күрэх буолбута? Онно биһиги «Экипаж» хамаандабыт Саха сирин аатын чиэстээхтик көмүскээн, дойду үрдүнэн бочуоттаах III-с миэстэни ылан кыайыы өрөгөйүн билбиттэрэ.
Бүгүҥҥү тэрээһин саамай уратыта диэн — мэтээллэри оҕолорго Россия Геройа Николай Владимирович Евдокимов илэ бэйэтинэн туттарда! Көрөрө-истэрэ суостаах, ол эрэн олус эйэҕэс майгылаах Герой хас биирдии юнармеецка илиитин биэрэн, истиҥник эҕэрдэлээтэ. Герой илиититтэн наҕараада ылыы — доҕотторбутугар улахан чиэс уонна олох тухары умнуллубат өйдөбүл буолара чуолкай.
Мэтээл ыллылар:
- Слепцов Алексей (XI «а» кылаас)
- Пестерев Родион (XI «а» кылаас) •
- Сивцева Виолетта (X «б» кылаас) •
- Марков Константин (IX «б» кылаас) •
- Ефремов Айсен (IX «б» кылаас)
Биһиги кыайыылаахтарбытынан, убайдарбытынан уонна эдьиийбитинэн олус киэн тутабыт! Кинилэр курдук дьулуурдаах, күүстээх санаалаах буоларга хас биирдиибит баҕарар.
«Экипаж» хамаандатыгар өссө да үрдүк ситиһиилэри, ыраас халлааны уонна саҥа кыайыылары баҕарабыт! Саха сирин оҕолоро ханна да сырытталлар, бастыҥнар кэккэлэригэр сылдьалларын өссө төгүл дакаастаатыгыт.
Уруйдаан ПЛАТОНОВ, VI кылаас
«АЛиК» медиа-киин
Л.В. Киренскэй аатынан Амматааҕы лиссиэй