Доготтоор, Дьааҥыттан көҥүл тустууга бастакы ССРС маастара ким буоларын билэҕит дуо? Саамай сөп. Биһиги биир дойдулаахпыт Никитин Климент Алексеевич.
Боронук орто оскуолатын спотивнай саалатыгар кини аата иҥэриллибитэ. Оскуолабытыгар Бүтүн Арассыыйатааҕы Бастыҥнар хамсааһыннарын Дьааҥытааҕы салайааччыта Светлана Ноговицына, дириэктэр сүбэһитэ Мирослава Горохова көҕүлээһиннэринэн Бастакы дьоммут диэн эйгэтэ Дьааҥыттан бастакы көҥүл тустуу маастара Климент Никитиҥҥэ анаммытынан киэн туттабыт. Кини бүтүн биир эркиҥҥэ батаран 11 кылаас талааннаах үөрэнээччитэ Александра Шестакова, учууталбыт М.Я.Слепцова уруһуйдаатылар.
Климент Алексеевич Никитин олунньу 4 күнүгэр 1944 с. Верхоянскай оройуонун Эҥэ нэһилигэр төрөөбүтэ. 1961 сыллаахха Верхоянскай орто оскуолатын бүтэрбитэ. Идэтинэн инженер-тутааччы тутуу маастара. 1970-1980 сылларга тутуу биригэдьииринэн үлэлии сылдьан Боронукка 50 миэстэлээх дьааһыла-саад, 108 миэстэлээх икки этээстээх уопсай дьиэ, совхоз отделениятыгар аһылык куукуната, икки квартиралаах олорор дьиэ тутуллубута. Климент Алексеевич салайар биригээдэтэ Верхоянскай куоракка уонна Арыылаах нэһилиэгэр социальнай эйгэ дьиэлэрин тутан үлэҕэ киллэрбитэ. Кини коммунистическай үлэ ударнига, тэрилтэлэр икки ардыларынааҕы социалистическай куоталаһыы кыайыылааҕа.
Климент Алексеевич эдэригэр спордунан көхтөөхтүк дьарыктаммыта, Ол курдук 1968, 1969 сыллардаахха Сэбиэскэй Союзка көҥүл тустуу чемпиона. Кыратык историяттан кэпсиир буоллахха, 1968 сыллаахха Украина Чернигов куоратыгар Советскай Союз зональнай күрэхтэһиитигэр Клим Никитин саха тустууктарыттан соҕотоҕун бастыыр уонна Союз финалыгар кыттар быраап ылар. Союз финала Махачкала куоракка буолбута. Кини икки киһини кыайан баран үһүс эргииргэ Аан дойду биэс төгүллээх чөмпүйүөнэ Али Алиевтыын тустубута, икки төгүл ыраастык уурбутун үрдүнэн, хомойуох иһин, ыйааһыныгар 7 миэстэ буолбута.
Манна эбэн биэрдэххэ, тустууну билээччилэр Климент Никитини «король мельницы» дииллэр эбит. Али Алиевы мельницаҕа түһэрэн, чыысто барардыы тута сыттаҕына, свисток тыаһаан сынньана бараллар.
Сарсыҥҥытыгар туох баар спорт хаһыаттарыгар, сурунаалларыгар «Сын Далёкого севера, деревенский парень из Верхоянска» диэн сөҕөн-махтайан суруйбуттар.
Ити курдук Али Алиевы муоска түһэрбитин туһунан дьиҥнээх кэпсээни билэбит.Клим Алексеевич күн бүгүнүгэр диэри оройуон иһинэн ыытыллар шашка уонна шахмат күрэхтэһиилэригэр көхтөөхтүк кыттар, хас да төгүллээх призер уонна чемпион.
Климент Алексеевич аата төрөөбүт нэһилиэгин уонна улууспут Бочуоттаах кинигэтигэр киирбитэ, Боронук нэһилиэгин XX үйэ бастыҥ киһитэ аат иҥэриллибитэ. Дьааҥы куоратын уонна Дьааҥы оройуонун Бочуоттаах гражданина, үлэ бэтэрээнэ.
Петя Заборовскай, Үөһээ Дьааҥы улууһа, Боронук орто оскуолата, 5 кылаас