Олунньу 17-20 күннэригэр Мэҥэ-Хаҥалас улууһун нэһилиэктэринэн кэрийэ сылдьан, Саха Өрөспүүбүлүкэтин ситэриилээх былааһын уорганнара ааспыт сыл түмүгүнэн отчуотун саҕалаата.
Баатара нэһилиэгэр мунньах олунньу 17 күнүгэр Г.Г. Колесов аатынан сынньалаҥ киинигэр ыытылынна. Саалаҕа тобус-толору дьон муһунна. Улууспут баһылыга Дмитрий Иванович Тихонов отчуот чилиэттэрин кытта билиһиннэрдэ. Сүрүн мунньаҕы Саха Өрөспүүбүлүкэтин экономикатын миниистирэ Петр Иванович Попов салалталаах халыҥ хамаанда өрөспүүбүлүкэбитигэр ааспыт сылга туох үлэлэр ыытыллыбыттарын билиһиннэрдэ.
Ол курдук Петр Иванович Аҕа дойдуну көмүскээччилэр сылыгар анал байыаннай дьайыы кыттыылаахтарыгар уонна кинилэр дьиэ кэргэттэригэр, элбэх оҕолоох дьиэ кэргэттэргэ, дьиэ-уот, коммунаалынай хаһаайыстыба, оҕо харыстабылыгар, үөрэх, доруобуйа, экономика уонна экология хайысхаларыгар туох сүҥкэн үлэлэр ыытыллыбыттарын сырдатта, күөх экраҥҥа инфографика быһыытынан барыта көстө турара өйдөнүмтүө этэ.
Отчуот кэннэ нэһилиэнньэттэн ыйытыктар киирбиттэрэ. Олохтоох – Попов Николай Михайлович этиититтэн саҕаланна. Кини передвижной заправкалар үлэлииллэрэ буоллар диэн этиилээх. ЖКХ холобура субсидияҕа олорор маннык курдук ититии (газ) өттүгэр өйөбүл баар буолуо дуо диэн Захарова Зоя Николаевна ыйытта. Корякин Иннокентий Иннокентьевич күөх төлөн киирбитинэн махтал тылын биллэрдэ.
Ол курдук, Ф.К. Попов аатынан Баатара орто оскуолатын дириэктэрин эбээһинэһин толорооччу Жиркова Анна Петровна маннык диэн ыйытта: «2024 сыллаахха Айсен Сергеевич Николаев кэлэ сылдьыытыгар 40 миэстэлээх кадетскай интернат тутуутун туруорсубуппут, билиҥҥи туругунан испиэһэккэ 17 миэстэҕэ сылдьабыт, бу былырыыҥҥы миэстэттиттэн туох эмит хамсааһын баар дуо?». Бу боппуруоска Петр Иванович хоруйдаата.
Эдэр саҥа кэлбит омук тылын учуутала Охлопкова Аина Владимировна олорор уопсай дьиэ усулуобуйата олус мөлтөх диэн бэлиэтээтэ. Улуус, Өрөспүүбүлүкэ өттүттэн көмө көрүллүө дуо диэн ыйытыытын биэрдэ.
Мустубут дьон бары ыйытыктарыгар толору эппиэттэри ылан, былырыыҥҥытааҕар быйыл отчуокка кэлбит дьон 4 ахсаанынан элбээбитин ону тэҥэ мунньах олус сэргэхтик ааспытын сыаналыыбыт. Маннык дьаһаллар нэһилиэнньэни кытта ситими бөҕөргөтөллөр, кыһалҕалары быһаарарга көмөлөһөллөр
Баишева Ванесса,
Ф. К. Попов аатынан Баатара орто оскуолатын 10 кылааhын үөрэнээччитэ,
«РОСТ в Объективе» медиакиин
Кэскил14.ру