Үөһээ Бүлүү Ороһу орто оскуолатыгар Аҕа дойдуну көмүскээччилэр күннэригэр анааллаах тэрээһин буолан ааста. Оскуола физкультураҕа учуутала Данилов Алексей Петрович Ороһу нэһилиэгиттэн Анал байыаннай дьайыыга сэриилэһэ сылдьар хорсун буойуттар тустарынан этэн туран, устуруойунан хаамыы саҕаланарын биллэрдэ.
Хаамыы иккис кылаас үөрэнээччилэриттэн саҕаланна. Быраатым иккис кылаас үөрэнээччитэ. Кылаастарыгар тоҕус уол уонна биир кыыс баар. Учууталлара Лена Васильевна Данилова. Быраатым Олег Захаров эрдэттэн билэрэ этэрээт хамандыыра буоларын. Тэрээһин буолар сарсыардатыгар саҥарыахтаах тылын хатылаан, байыаннай таҥаһын бэлэмнэтэн ох курдук оҥостон барбыта. Ол да курдук, этэрээтин чуор куолаһынан хамаандалаан, хорсуннук, байыаннайдыы хааман тиийэн, чиэс биэрэн баран этэрээтэ устуруойдаан хаамыыга бэлэмин туһунан араапардаата. Таһыгар турбут учууталлар кини араапарын хайҕаан бэйэ-бэйэлэрин кытта кэпсэппиттэрин истэн, Олег үөрэ иһиттэ уонна этэрээтигэр эрэллээхтик хааман тиийэн турунан кэбистэ. Дьиэтигэр тиийэн аҕатыгар Иван Семеновичка, ийэтигэр Галина Юрьевнаҕа оскуола оҕото барыта көрөн турарыттан санаата ыгыллан ылбытын, долгуйбутун даҕаны, ол эрээри хорсун быһыытын сүтэрбэккэ араапар биэрбитин кэпсээбитигэр, төрөппүттэрэ кининэн киэҥ туттубуттара, хайҕаабыттара.
Быраатым бастакы хамандыыр буолбут уопута, инникитин даҕаны элбэх ситииһиини аҕала туруоҕа. Олег бэриллибит сорудаҕы эппиэтинэс курдук ылынан, толорор дьоҕуруттан киэн туттабын.
Умнуллубат түгэни хаартыскаҕа түһэрдэ Варвара БЮЛТЯСОВА,
Алина ГАБЫШЕВА,
«Тымтык» эдэр кэрэспэдьиэннэрин поһун юнкора,
Үөһээ Бүлүү ,Ороһу