Олунньу 19 күнүгэр биһиги оскуолабытыгар Аҕа дойдуну көмүскээччи күнүгэр анаммыт үгэскэ кубулуйбут устуруойунан хаамыы уонна ырыа күрэҕэ буолан ааста. Күрэххэ иккис кылаастан саҕалаан онус кылааска диэри бары кылаастар икки симиэнэнэн кытыннылар.
Бу тэрээһини ыҥырыылаах ыалдьыттарбыт үөрүүлээхтик аспыттара:
- Ефимов Егор Ильич- полиция полковнига, тэрээһин бочуоттаах ыалдьыта;
- Иванов Дмитрий Зиновьевич – анал байыаннай дьайыы бэтэрээнэ;
- Бережнова Елена Владимировна – социальнай үлэһит. Суоттуур хамыыһыйа координаторынан биһиги оскуолабыт выпуснига, ЯПК устудьуона, физькультура салаатын лидерэ Копытцева Анастасия буолбута.
Иккис сменаны салайан ыыппыттара:
- Керемясов Айсен Александрович- анал байыаннай дьайыы бэтэрээнэ;
- Булкин Михаил Константинович – СӨ МЧС баһаары умулларар сулууспатын салайааччытын солбуйааччыта;
- Константинова Мария Валерьевна – Дьокуускай куоратын полициятын отделын сокуоннай саастарын ситэ илик оҕолор дьыалаларын старшай инспектора.
Ыҥырыылаах ыалдьыттарбыт хас биирдии кылаас хаамыытын олус сыныйан көрдүлэр. Байыаннай таҥастан-саптан саҕалаан оҕолор стройга марштаан хаамалларын, ырыаларын доргуччу ыллыылларын, хамандыыр бирикээһин чопчу оҥороллорун сыаналаатылар. Көрүү түмүгүнэн, судьуйалар кылаастар баалларын ааҕан, миэстэлэрин таһаардылар. Бастыҥ хамандыырга уонна үс уһулуччу хамаандаҕа бириистээх миэстэни туттардылар.
Кэлбит ыалдьыттарбыт оҕолорго үөрэххэ ситиһиилээх буолалларыгар уонна аныгыскыга өссө күүскэ бэлэмнэнэллэригэр баҕа санааларын эттилэр.Оскуолабыт үөрэнээччилэрэ, төрөппүттэрэ бу күрэхтэн олус астынан тарҕастылар. Физкультура учууталларыгар, кылаас салайааччыларыгар бу хаамыыны бэлэмнээбиттэригэр махтанабыт. Кэлэн иһэр Аҕа дойдуну көмүскээчиилэр күнүнэн хорсун уолаттарбытын, убайдарбытын, аҕаларбытын истиҥник эҕэрдэлиибит.
Ангелина ПАВЛОВА,
Дьокуускай 17 № орто оскуолатын 7 ”д” кылааһын үөрэнээччитэ,
“Сайдын” медиакиин эдэр корреспондена