Саха Өрөспүүбүлүкэтин Бырабыыталыстыбатын 2025 сыллааҕы отчуотун чэрчитинэн олунньу 18 күнүгэр Ньурба улууһун Таркаайы нэһилиэгэр СӨ тыа хаһаайыстыбатын уонна ас-үөл бэлиитикэтин миниистирэ Артем Александров салайааччылаах оробуочай бөлөх сырытта.
Көрсүһүү дьиҥ ис хоһоонноох буолан ааста. Нэһилиэк олохтоохторун чопчу долгутар ыйытыылара бэрилиннэ уонна онно хоруйдары ыллылар, иһиттилэр.
Олохтоохтор биир сүрүн туруорсар боппуруостарынан айылҕа харыстабылын, экология тула буолла. Тыа сирин олохтоохторугар айылҕа — олох сүрүн тирэҕэ. Бу күн дьиҥнээх «айылҕа куолаһынан» оройуон уопсастыбаннай эколога Виссарион Егорович Николаев буолла. Кини айылҕа туругар сыһыаннаах элбэх боппуруоһу көтөхтө.
Маны таһынан олохтоохтортон уот тарыыба үрдээбитин, учууталлар хамнастарын үрдэтии, култуура киинэ тутуллуутун курдук боппуруостар киирдилэр. Кырдьык, олохтоохтору долгутар боппуруос элбэх буолла.
Олохтоохтортон киирбит ыйытыылар, ордук айылҕаҕа уонна экологияҕа сыһыаннаахтар, миниистир уонна үлэлиир бөлөх чилиэннэрэ тус хонтуруолга ыллылар.
Таркаайы нэһилиэгин олохтоохторо ситэриилээх былаас 2025 сыллаах отчуотун сөптөөҕүнэн аахтылар.
Валя НИКОЛАЕВА суруйуута, Радомир ФЕДОРОВ хаартыскалара,
«Уткин сонуннара» медиа-киин, К.Д. Уткин аатынан Марха орто оскуолата.
Кэскил14.ру