Бүгүн, олунньу 17 күнүгэр, А.Г уонна Н.К. Чирээйэптэр ааттарынан Саха национальнай гимназия 4 «А» кылааһыгар истиҥ иһирэх, умнуллубат түгэн буолан ааста. «Өксөкү сиэнэ – Уран уус» хайысха үлэтин иһинэн уонна кэлэн иһэр Аҕа дойду көмүскээччилэрин күнүн көрсө, оҕолор «Күүтэр Эйигин, төрөөбүт дойдуҥ!» диэн акцияҕа кытыннылар. Бу акция чэрчитинэн «Боевые шелкопряды» волонтерскай хамсаныы активиһа Анна Николаевна Никифорова-Эбээ Талбаана Анал байыаннай дьайыыга сылдьар саха саллааттарыгар аналлаах ыраастанар «Алгыс» набору оҥорууга маастар-кылаас ыытта.
Бу көрсүһүү көҕүлээччитэ – Эбээ Талбаана сиэнэ, 4 «А» кылаас үөрэнээччитэ София Борисова буолар. София бэйэтэ эмиэ эдэр волонтер, эбээтин кытта тэҥҥэ набордары оҥорсор, волонтеркай үлэҕэ көмө буолар. Кини эбэтин кылааһыгар аҕалан, бэйэтин холобурунан биир кылааска үөрэнэр оҕолорун үтүө дьыалаҕа кыттыһыннарда.
Боҕуруоскай оту Таатта улууһун оҕолоро хомуйбуттара. Саллааттар этэллэринэн бу от: «Саха сирин сыта, ийэбит сыта». Ол аата, от сытын ылан, саха саллаата төһө ыраах да сырыттар, төрөөбүт дойдутун, күөх алааһын, күндү ийэтин санаан санаата көтөҕүллэр, хорсун санаата күүһүрэр. Туоһу үүнэн турар хатыҥтан ылбаттар – айылҕаны харыстыыллар. Эмэҕирэн сууллубут мастан ылаллар. Сиэл булгуччу маҕан өҥнөөх буолуохтаах. Маҕан өҥ үтүө санаа, ыраастаныы уонна Дьөһөгөй алгыһын бэлиэтиир. «Биһиги былыргы өбүгэлэрбит маннык ыраастаналлар эбит. Ол иһин ыраах айаннаатыбыт да туттабыт» – диэн Эбээ Талбаана үллэһиннэ.
Набор таһынан оҕолор бэйэлэрин илиилэринэн открытка уруһуйдаан оҥордулар. Онно саха саллааттарын өйүүр сылаас тылларын суруйдулар:
«Күндү саллаат, мин аатым Сивцев Матвей. Мин эйигин наһаа сыаналыыбын. Дойдугун харыстыыргын. Мин билэбин эһиэхэ онно ыарахан. Саллаат күүтэр эйигин төрөөбүт дойдуҥ! Аҕа дойдуну харыстыыгын, ол аата күүстээххин, хорсун санаалааххын. Күүтэр эйигин төрөөбүт дойдуҥ!»
Маастар-кылаас кэмигэр оҕолор сүргэлэрэ көтөҕүллэн, бэйэлэрин бастакын набордарын оҥордулар. Хас биирдии оҕо үлэтигэр бэйэтин санаатын уурда:
Тимур Слепцов:
«Биһиги үчүгэй баҕайы набор оҥордубут. Интэриэһинэй баҕайы. Саллааттарга туһалаах буолуо».
Эмилия Максимова:
«Мин бастакыбын манныгы оҥордум, үөрдүм аҕай. Сыта игин наһаа үчүгэй».
Маргарита Николаева:
«Ити мин бастакы оҥорбут наборум, миэхэ олус интэриэһинэй этэ.
Матвей Сивцев:
«Бүгүн биһиги саллааттарга набор оҥордубут. Онно от, туос, сиэл уктубут. Саллааттарга билигин наһаа ыарахан, ол иһин биһиги кинилэргэ көмө ыытабыт».
Максим Заболоцкий:
«Мин наборум саллааттарга туһалыа уонна харыстыа».
Сандаара Степанова:
«Бу набору саллааттар ыраастаналларыгар оҥорбутум. Туос сыта дойдуларын санатыа».
Оннук курдук «Күүтэр эйигин, төрөөбүт дойдуҥ!» диэн ааттаах акция Саха өрөсбүүбүлүкэлэрин оскуолаларыгар бастакытын ыытылынна. А.Г. уонна Н.К Чирээйэптэр ааттарынан саха национальнай гимназия 4 «А» оҕолоро үтүө санаа салгыы баран атын оскуола оҕолорун акцияҕа кыттыыны ыларга ыҥыраллар.
keskil14.ru