Саха норуотугар үҥкүү улахан суолталаах. Саха үҥкүүтэ норуот олоҕун, сыаннастарын, аймахтарын уонна дьонун дууһатын айан көрдөрөр аналлаахтар.
Кыра эрдэхпиттэн мин үҥкүүлүүрбүн олус сөбүлүүбүн. Ол иһин биэс сааспыттан Майатааҕы «Кыталык» ансаамбылга дьарыктаммытым. «Кыталык» үҥкүү норуодунай ансаамбыла, РФ норуотун айымньытын үтүөлээх коллектива, 1979 сыллаахха ахсынньы 7 күнүгэр Саха өрөспүүбүлүкэтин Мэҥэ-Хаҥалас улууһун Майа нэһилиэгэр төрүттэммитэ. Үҥкүү ансаамбылын төрүттээччитинэн уонна кини уус-уран салайааччытынан РФ култууратын үтүөлээх үлэһитэ, САССР култууратын үтүөлээх үлэһитэ, өрөспүүбүлүкэ таһыгар биллэр хореограф, үҥкүү туруорааччы Василий Павлович Винокуров буолар.
Билигин «Кыталык» ансаамбыл үс филиаллаах: Мэҥэ-Хаҥалас улууһун Майа нэһилиэгэр сүрүн филиал, Мэҥэ-Хаҥалас Аллараа Бэстээҕэр уонна Дьокуускай куоракка кэлин өссө филиаллар арыллыбыттара.
Биэс сааспар уҥкүүһүт суолбун спортивнай бальнай уҥкүүнэн саҕалаабытым. Учууталбыт Крылов Илья Валентинович боростуой уһуйаан оҕолоруттан дьиҥнээх үҥкүүһүттэри таһаарар этэ. Уон сааспар диэри сүрэҕэлдьээбэккэ, көтүппэккэ сылдьан араас турнирдарга кыттыыны ылбытым. Инньэ гынан кыра эрдэхпиттэн ситиһиим элбэх.
Уон сааспын туолан баран хайысхабын уларытарга санаммытым. Майатааҕы муусука оскуолатын эмиэ “Кыталык” ансаамбылыгар хореография кылааһын иитиллээччитэ буолбутум. Онно сүрүн хайысхабыт “фитнес-аэробика” этэ, ол быыһыгар “классический танец”, “гимнастика”, “народный танец” уонна “сольфеджио” диэн саҥа уруоктар уонна үҥкүү көрүҥнэрэ миэхэ арыллыбыттара. Хата учууталбыт Соловьева Александра Петровна бэйэтин дьыалатыгар профессионал буолан барытын түргэнник үөрэппитим, сатаабытым, үчүгэй уопуттаммытым. Хомойуох иһин, мин улааппыт, олохсуйбут Майабыттан көһөргө тиийбиппит.
Дьокуускай куоракка көһөн баран үҥкүүлүүр санаам барыта түспүтэ. Үс сыл устата современнай үҥкүүнү боруобалаан көрбүтүм даҕаны, миэхэ барсыбат диэн түмүккэ кэлбитим. Өр бириэмэ олох үҥкүүнү тохтоппутум. Кэлин оскуолам ансаамбылыгар киирбитим, ол даҕаны мэлдьи ыытыллар дьарык буолбатах этэ.
Ааспыт сыл күһүнүгэр соһуччу “Кыталык” Дьокуускай куораттааҕы филиала саҥа эдэр ыччаты ылар буолбут диэн биллэриини булбутум. Өр толкуйдаабакка боруобалыы барбытым. Номнуо бэһис ый коллектив чилиэнэ буолан сылдьабын. Бу сырыыга салайааччым Давыдова Алена Геннадьевна — СӨ култууратын туйгуна. Тугу көтүппүппүн ситиһэн, төттөрү үҥкүүһүт олоҕугар кыттан, олус астына сылдьабын. “Кыталыкка” киирэммин, төттөрү оҕо сааспар төннүбүт курдук бэйэбин сананабын, урукку оҕолор, үҥкүүлэр, оннооҕор көстүүмнэр… Үс сыл иһигэр норуодунай үҥкүүлэри, коллектив тыынын уонна сыананы олус ахтыбыт эбиппин! Бу биэс ый устата сүрдээх элбэх концертарга кыттыыны ыллым. Хас биирдии репетиция, сыанаҕа тахсыы, үҥкүү миэхэ дуоһуйууну биэрэр!
Үҥкүү диэн миэхэ киһи саҥатын, ис санаатын уонна тылын көрдөрөр искусство.
“Кыталык” — олоҕум улахан аҥара, дьоллоох түгэннэрим уонна күннэрим. Үҥкүүнү талбыппыттын ис дууһабыттан үөрэбин. Ол көмөтүнэн саҥа доҕоттору уонна саҥа олоҕу буллум!
Айсена Брызгалова, Дьокуускай к.1№дээх оскуолатын 10 кылааһын үөрэнээччитэ.
keskil14.ru