Халлааҥҥа баар кэрэ көстүү – дьүкээбил дьиримнии умайан киэһээҥҥи халлааны олус киэргэтэр. Ол курдук, биир тымныы күҥҥэ биһиги Лөгөйбүт лиссиэйигэр кэрэ көстүүлээх, ыраас алыптаах куоластаах, гитара доҕуһуоллаах «Дьүкээбил» диэн ырыа биэчэрэ саҥа бырайыак буолан дьон сэҥээриитин ылла.
Медиаоскуола салайааччыта, «Open air» күөх халлаан анныгар үҥкүү бырайыак ааптара Любовь Петухова кылааһын оҕолорун кытта өссө биир умнуллубат түгэни лиссиэйбитигэр ууннулар. Кинилэр 2024 сыллаахха оскуоланы бүтэрэн олох киэҥ аартыгар үктэммиттэрэ. Үксүлэрэ култуура салаатынан үөрэххэ киирбиттэрэ уонна күн бүгүнүгэр диэри үөрэммит кыһаларыгар көмөлөһө сылдьаллар.
Биллэн турар, маннык улахан тэрээһин волонтердара суох буолбат. Ол курдук, 11-с кылаас коллектива – «Айар ситимнэр» – күүс-көмө буоллулар. Дьоро киэһэни оскуолабыт оҕолоро Володя Игнатьев, Дима Нафанаилов, Костя Попов, Эдик Матвеев, Илья Иванов, Алеша Бурнашев киэргэттилэр. Тэрээһин умнуллубакка ааһарын туһугар оскуола устудьуон доҕотторбут көмөлөстүлэр: Арсен Соловьев, Арсен Сокорутов, Антон Тищенко, Ваня Колодезников, Арьяна Олесова, Арина Попова, Олеся Попова, Никита Петухов, Коля Олесов кытыннылар уонна кинилэр доҕотторо Айастан Шепелев уонна Артур Уваров кэлэн киэһэни өссө истиҥ оҥордулар.
Учууталларбыт эмиэ туора турбакка, бэйэлэрин оҕолорун, бырайыагы өйөөн кытыннылар: Егор Герасимов, Анастасия Колесова уонна оскуола дириэктэрэ Михаил Пухов оҕолору кытта тэҥҥэ дууһаҕа сылаастык киирэр ырыалары бэлэхтээтилэр.
Кэнсиэр кэннэ дьүкээбил уоттаах дискотека буолла. Кырдьык даҕаны, «Дьүкээбил» курдук кэрэчээн көстүүлээх, киһиэхэ сылаастык киирэр бэлиэ аатынан гитара доҕуһуоллаах дьоро киэһэ олунньу 7 күнүгэр биһиги Лөгөйбүт лиссиэйигэр буолан ааста.
Павел ГЕРАСИМОВ, Лөгөй лиссиэй-интэринээт LegMedia эдкора