«Өрөгөй» спорт уораҕайыгар олунньу 7-8 күннэригэр «Хаҥалас Хапсаҕайа» норуоттар икки ардыларынааҕы хапсаҕайга күөн күрэс ыытылынна. Иккис төгүлүн норуоттар икки ардыларынааҕы аатынан тэриллэр, төрүт көрүҥмүтүгэр биир бастыҥ уонна улахан турнир элбэх кыттааччыны уонна көрөөччүнү муста, дьон болҕомтотун тарта.
Манна бэйэлэрин кыахтарын холонон 10 дойдуттан 500-чэ бөҕөс кииристэ. Маҥнайгы күн көбүөргэ 85,95,95-тэн үөһээ киилэҕэ диэри эр дьон, 80,90,90-тан үөһээ киилэҕэ диэри бэтэрээннэр кииристилэр.
Бастакы күн түмүгэ маннык буолла:
Эр дьон 85кг диэри: 1м-Арсалан Будажапов (Кыргызстан) 2м-Игорь Софронеев (Саха) 3м-Зоригто Ухинов (Бурятия) 95кг диэри: 1м-Андриан Ленскай (Саха) 2м-Александр Халыев (Саха) 3м-Юрий Иванов (Саха) 95кг үөһээ: 1м-Туг-Эрдэдэ Дензеншарав (Монголия) 2м-Никита Софронов (Саха) 3м-Никита Хабаров (Саха).
Бэтэрээннэр 80кг диэри: 1-Прокопий Петров (Саха) 2-Вячеслав Стрекаловскай (Саха) 3-Геннадий Прокопьев (Саха) 90кг диэри: 1-Дмитрий Шадрин (Саха) 2-Платон Саввинов (Саха) 3-Булат Дашинимаев (Бурятия) 90кг үөһээ: 1-Аяс Монгуш (Тыва) 2-Степан Гаврильев (Саха) 3-Цыбик Максаров (Бурятия).
Аар-Дархан аатын быһаарар хапсыһыылар түмүктэринэн сахабыт уола, Муома хайата Никита Хабаров кыайыылаах буолан сахатын дьонун үөртэ. Киниэхэ 0,5 карат бриллианнаах мэтээл, чөмпүйүөн кура, үрүҥ көмүстээх батыйан уонна 200 тыһ. уу харчынан бэрилиннэ.
Иккис күн ордук күүрүүлээх уонна тыҥааһыннаах буолан биэрдэ. Бу күн ааттаах-суоллаах бөҕөстөр кииристилэр. Бырааттыы бүрээт, тыва бөҕөстөрө таһымнара үрдүгүн, санаалара бөҕөтүн көрдөрөн сөхтөрдүлэр уонна соһуттулар.
Түмүк маннык буолла:
Эр дьон 57кг диэри: 1-Николай Захаров (Саха) 2-Дмитрий Иванов (Саха) 3-Пантелеймон Николаев (Саха) 65кг диэри: 1-Александр Богомоев (Бурятия) 2-Чимит Жамсаранов (Бурятия) 3-Айхан Антонов (Саха) 75 кг диэри: 1-Евгений Жербаев (Бурятия) 2-Дмитрий Будажапов (Иркутскай уобалас) 3-Сандан Гармаев (Бурятия).
75 киилэҕэ диэри муҥутуур кыайыылааҕынан Иркутскай уобалаһыттан Дмитрий Будажапов буолан Аар Дархан аатын сүктэ, батыйа, кур, бириис уонна мэтээл хаһаайына буолла.
Арыллыы сиэрин-туомун кэмигэр хапсаҕай федерациятын президена, сүрүн тэрийээччи Вячеслав Анатольевич Нестеров олимпиецтарбытыгар Павел Пинигиҥҥа уонна Александр Ивановка холбоон 2 000 000 сууммаҕа 10 кулуҥҥа сертификаттары бэлэх уунна.
«Хаҥалас Хапсаҕайа» гран-при күрэс тэриллии үрдүкү таһымын көрдөрдө. Саха төрүт тустуутун — хапсаҕайы аан дойду таһымыгар таһаарар сыалын ситэн өссө күүскэ сайдарыгар олук уурда диэн этиэххэ наада. Сахалар бэйэбит төрүт көрүҥмүтүн өссө күүскэ баһылаан, күүстээх дьарыктары ыытан аныгыскы күрэхтэһиилэри үрдүкү ситиһиилэрдээх көрсүөх тустаахпыт тоҕоостооҕо билиннэ.
Анжелина ЖДАНОВА, ХИФУ устудьуона.
Автор хаартыскалара.
keskil14.ru