Олунньу 3 күнүгэр Майатааҕы «Сардаана» оҕону сайыннарар кииҥҥэ олус суолталаах уонна дириҥ ис хоһоонноох тэрээһин «Оҕо доруобуйата — эн илиигэр» диэн төрөппүттэр ааҕыылара үрдүк таһымнаахтык буолан ааста.
Тэрээһин анал балаһыанньанан бигэргэтиллэн, дьиэ кэргэҥҥэ чөл олох тосхоллорун тарҕатыыга, төрөппүттэр оҕолорун чөл туруктаах буола иитиилэригэр уопут атастаһар түһүлгэлэрин быһыытынан тэрилиннэ. Ааҕыы биэс сүрүн хайысханан ыытылынна, төрөппүттэр бииртэн биир интэриэһинэй, баай ис хоһоонноох дакылааттарынан кытыннылар.
«Ас — доруобуйа төрдө» хайысхаҕа «Кэрэли» оҕону эбии үөрэхтээһин киинин «Мультимедийнэй куруһуок» салайааччыта Вера Аргунова төрүт өбүгэлэриттэн утумнаан кэлбит «Бөрүөк от туһата» тиэмэни билиһиннэрдэ. Кини бөрүөк оту күннээҕи аска хайдах туттарын кэпсээтэ, ону таһынан бэйэтэ астаабыт бүлүүдэлэрин аҕалан истээччилэри күндүлээтэ. Бөрүөк отунан дьиэни-уоту ыраастаныы былыргы ньыматын көрдөрдө.
Салгыы бу хайысхаҕа Усуйаанаттан төрүттээх Елизавета Дьячковская «Оҕолорго балык туһата» тиэмэтинэн балык оҕо улаатарыгар улахан суолталааҕын быһаарда. Хоту дойду дьиҥнээх баайыттан — чыыртан араас бүлүүдэлэри астыырын эттэ. Бэйэтин минньигэс бүлүүдэтинэн күндүлээтэ.
«Хамсаныы — олох тыына» хайысхаҕа Гоголевтар дьиэ кэргэн ийэлэрэ Лариса Александровна, балыыһа сүрүннүүр исписэлииһэ дьиэ кэргэнинээн успуорду уонна үҥкүү кэрэ эйгэтин дьүөрэлии тутан доруобуйаны бөҕөргөтүү, эти-сиини эрчийии туһунан уопуттарыттан үллэһиннэ. Лариса Александровна оҕолорун үҥкүү эйгэтигэр уонна успуорка хайдах уһуйалларын, бииргэ дьарыктаналларын туһунан иһитиннэриитэ олус интэриэһинэй буолла.
Саха киһитэ айылҕатынан кыра эрдэҕиттэн хамсанан улаатара саарбаҕа суох.
Хас биирдии туттуу-хаптыы, хамсаныы, иҥиир-былчыҥ уунаҥныыра, киһи чэгиэн эттээх-сииннээх сылдьарыгар күнүн ахсын сэрээккэлэр олус туһалаахтар. Маннык санаанан салайтаран ааҕыы кыттыылааҕа Светлана Дьяконова «Хамсаныы — олох төрдө» дакылаатынан кыттыыны ылла.
Маны таһынан, төрүт сахалар остуол оонньууларын туһунан сахалыы остуол оонньууларыгар успуорт маастара Анатолий Иванов кэпсээтэ. Кини «Хабылык, хаамыска» оонньуулары көрдөрдө, сүрүн быраабылаларын билиһиннэрдэ. Оҕолор бэйэлэрэ холонон көрөн олус астыннылар. Өссө Анатолий Анатольевич оҕо өйүн-санаатын, илиитин былчыҥын сайыннарарга уонна сымса буоларга «Иэрэгэй» диэн саха төрүт оонньуутун төрөппүттэргэ сүбэлээтэ.
Тэрээһиҥҥэ төрөппүттэр бары бэлэмнэнэн кэлбиттэр. Кинилэр анал уһулуктарынан хаартыска, видео, презентация уонна бэйэ оҥорбут бүлүүдэлэринэн көрдөрбүттэрэ олус кэрэхсэбиллээх буолла.
Бэлиэ күн истиҥ кэпсэтииттэн сүргэбит көтөҕүллэн, баай уопутунан кынаттанан, бары дьоллоох түгэни хаартыскаҕа үйэтиттибит. Оҕону чөл туруктаах буола иитии — биһиги дьоллоох кэскилбит саамай эрэллээх акылаата, доруобай омукпут бигэ тирэҕэ буолар.
Светлана ЛЕПЧИКОВА,
«Кэрэли» оҕону эбии үөрэхтээһин киинин «Мультмедийнэй журналистика» куруһуок иитиллээччитэ,
Майа, Мэҥэ Хаҥалас
keskil14.ru