Дьокуускайга саахымат уонна дуобат киинин иккис этээһигэр киһи сүрэҕин тэбиитэ иһиллэр чуумпута. Бу күннэргэ манна өрөспүүбүлүкэ оскуолаларын иһигэр «Белая ладья» эрэгийиэннээҕи саахымакка күрэх ыытылла турар. Барыта 90 кыттааччы, 24 хамаанда бастыыр иһин күөн көрсөр.
Күрэхтэһии классическай саахымат быраабылатынан барар. Бириэмэтин уһуна — 90 мүн., хаамыы аайы 30 сөк. эбиллэр. Күрэхтэһии судьуйата Петр Яковлев оҕолор сороҕор ыксаан хоттороллорун, бириэмэлэрэ бүтүөр диэри олорботторун этэр. Аны күрэхтэһии кэмигэр күрэхтэһээччилэр төлөпүөҥҥэ аралдьыйдахтарына, эбэтэр төлөпүөннэрэ тыаһаатаҕына, быһа хотторууну ылаллар эбит.
— Кыттааччылар сэрэтии эмиэ ылаллар, сэрэтиинэн эмиэ хоттороллор. Сатаммат хаамыыны оҥороллор, иккитэ оннук оҥордохторуна, хотторуу ылаллар. Төлөпүөн тыаһаатаҕына эбэтэр төлөпүөннээх оонньуу олорор буоллахтарына, эмиэ быһа хотторууну ылаллар, — диэн кини этэр.
— Кыттааччылары рейтиннэринэн ылар буоллахха, Чирээйэптэр ааттарынан Дьокуускайдааҕы национальнай гимназия үөрэнээччитэ Тимур Слепцов барыларыттан үрдүк рейтиннээх, бу рейтинг-фаворит дэнэр. Куорат оскуолаларыттан 2 №-дээх оскуола үчүгэй көрдөрүүлээх. Кинилэр былырыыҥҥы чөмпүйүөннэр. Ол эрээри 2-с оскуола хамаандата куорат чемпионатыгар Дьокуускайдааҕы национальнай гимназия хамаандатыттан кыайтарбыттара, иккис буолбуттара. Онтон билигин ох курдук оҥостубуттар быһылаах, үчүгэйдик кытта сылдьаллар. Тренердэрэ Охлопкова Мария Семеновна. Оройуоннартан Чурапчы Хатылы оскуолата инники күөҥҥэ оонньуу сылдьар, — кэпсиир күрэхтэһии судьуйата Петр Яковлев.
Салгыы Петр Спиридоновичтыын өрөспүүбүлүкэҕэ саахымат кулууптарын уонна тренердэринэн хааччыллыы туһунан сэһэргэстибит.
— Сэбиэскэй кэмҥэ саахымат кулууптара тэриллибиттэрэ аҕай, билигин олор сүппүттэрэ да диэххэ сөп. Анал саахыматы үөрэтэр тренердэр штаттара ДЮСШ-ларга бааллар, олор эмиэ аҕыйаатылар, суохтарын кэриэтэ диэххэ сөп. Инньэ гынан биһиги саахымакка хаалыылаахпыт диэххэ наада, холобура, дуобатчыттары кытары тэҥниир буоллахха. Дуобакка кыттааччы оҕотун ахсаана да элбэх, биһиэхэ буоллаҕына бу биир заалга оонньууллар. Дуобатчыттар кэллэхтэринэ, үс этээһинэн оонньууллар, өссө атын заалларга баран эмиэ оонньууллар. Онон кинилэргэ тренердэрэ да элбэх. Тыа оскуолаларыгар саахымакка көннөрү учууталлар дьарыктыыллар, кинилэр бэйэлэрэ саахыматчыт буолбатахтар, онон инньэ гынан таһымнара кыра диэххэ наада. Куорат оскуолалара ити чааһыгар үчүгэйдэр. Кинилэр бэйэлэрин оскуолаларыгар дьарыктаналлар уонна анаан-минээн туспа тренердэргэ эмиэ дьарыктаналлар.
Дьоҕурдаах оҕолор баар буолаллар, олору олох көрдөөн булуохха наада, күүскэ дьарыктыахха наада. Кэнники кэмҥэ кэккэ ситиһиилэр бааллар, Арассыыйа таһымыгар кыргыттарга Валерия Слепцова чемпионка, кини аан дойду чөмпүйэнээтигэр кыттыбыта. Ити 40-тан тахса сыл буолан баран Арассыыйаҕа баара-суоҕа иккис чөмпүйүөммүт. Валерия өрөспүүбүлүкэ чемпионатыгар дьахталларга кыттан иккис миэстэ буолбута.
Билиҥҥитэ куорат оскуолалара, биллэн туран, таһымнара үрдүк. Онон арааһата куорат оскуолаларыттан ким эрэ тахсара буолуо диэн эрэллээхпит.
Саахымакка күрэх олунньу 2-6 күннэригэр ыытыллар. Түмүктүүр 9-с түһүмэх олунньу 6 күнүгэр буолар.
keskil14.ru