Бүгүн биһиги оскуолабытыгар үөрүүлээх түгэни бэлиэтээтибит. Тохсунньу 23 күнүгэр оскуолабыт бастакы этээһин Рекреациятын аһыллыыта буолан ааста. Быйылгы сылга тапталлаах үөрэхпит кыһата элбэх уларыйыылартан саҕаланна.
Каникул кэмигэр оскуолабыт техническэй үлэһиттэрин, улахан кылаас оҕолорун сүбэлэрин, иитэр үлэҕэ организатордар Ай-Куо Айсеновна уонна Дайаана Сергеевна көмөлөрүнэн алын этээс киэҥ көрүдүөрэ саҥа аныгылыы тупсаҕай көрүҥнэммитэ. Истиэнэлэри саҥардан кырааскалаан, улуу киһибит М.Е. Николаев ох тылынан суруйан, уруһуйдаан күннэтэ хаамар көрүдүөрбүт саҥатык уонна уратытык көстөр.
Күннэй уонна Сергей Скрябиннар диэн оскуолабыт төрөппүттэрэ спонсордаан, алын кылаас рекреациятыгар сымнаҕас пуфиктар кэчигирээбиттэрэ. Скрябиннар улахан оҕолоро 9 кылааска дылы биһиги оскуолабытыгар үөрэммит. Билигин Москваҕа ситиһиилээхтик үөрэнэ сылдьар. Кыра уоллара Скрябин Дамир билигин 4 “а” кылааска үөрэнэр. Дьиэ кэргэнинэн бэйэлэрэ чааһынай “iDent“ диэн стоматологическай клиникалаахтар. Төрөппүттэрбит оскуолаларын наһаа үчүгэйдик саныыр уонна махталлаах буолан, олус үчүгэй көмөнү оҥорбуттар. Күннэй Лазаревна торжественнай тэрээһиҥҥэ кэлэн баран, өссө эбии саҥа түннүк сабыыта ылан биэриэх буолла. Маннык махталлаах төрөппүттэрбит элбии эрэ туралларыгар баҕарабыт.
Торжественнай тэрээһини 4”а” кылаас оҕолоро “Орлята” диэн ырыанан ыллаан аспыттара. Кылаас салайааччыта — Петрова Нина Чимитовна. Ол кэнниттэн директорбыт Анатолий Николаевич, төрөппүт Күннэй Лазаревна эҕэрдэ тылларын кэннэ уруһуйдаабыт улахан кылаас уонна 4 “а” кылаас оҕолоругар минньигэс туорт туттардылар. Сылтан сыл аайы оскуолабыт кэрэ көстүүлээх, ис көрүҥэ өссө тупса эрэ турдун, саҥа эбии улахан тутуубут өрөмүөнэ саҕаланнын диэн эрэнэ хаалабыт.
Ева ИСАКОВА,
Дьокуускай куорат №17 орто оскуолатын VII «Г» кылааһын үөрэнээччитэ,
“Сайдын” медиа киин эдэр кореспондена