Тохсунньу 19 күнүгэр, Чурапчы сэлиэнньэтигэр нэһилиэктэртэн туйгун үөрэхтээхтэр, араас тэрээһиннэргэ көхтөөхтүк кыттар оҕолор, элбэх ситиһиилээх спорсменнар Улуус баһылыгын харыйатыгар, «Айылгы» норуот айымньытын дьиэтигэр, муһуннулар. Уопсайа 300 тахса оҕо кыттыыны ылла.
С.А.Новгородов аатынан Чурапчы орто оскуолатыттан 43 үөрэнээччи бу үөрүүлээх күҥҥэ сылдьар чиэскэ тигистилэр.
Үөрүүлээх чааһы улуус баһылыга Степан Анатольевич Саргыдаев арыйда. Оҕолорго ааспыт сыл ситиһиилэрин билиһиннэрдэ, үүммүт саҥа сылга өссө үрдүк ситиһиилэри баҕарда. Улахан ситиһиилээх үөрэнээччилэри үрдүк сыанаҕа ыҥыран эҕэрдэ суруктары, бэлэхтэри туттартаата. Биһиги оскуолабытыттан 2 оҕо чиэстэннэ: «Бастыҥ үөрэнээччи-2025» анал аат иҥэрилиннэ Александров Коляҕа, 11 кылаас үөрэнээччитигэр; «Бастыҥ спортсмен-2025» анал аат ылла Монастырев Вова, 10 кылаас үөрэнээччитэ. Үөрэх управлениятын салайааччыта Юрий Павлович Посельский итии-истиҥ тылларынан оҕолору эҕэрдэлээтэ, өссө да үрдүк чыпчаалга дабайан үөрүү аргыстаах ситиһии кэлэ турдун диэн алҕаата. Ол кэннэ уопсай өйдөбүнньүк хаартыскаҕа түстүлэр.
Бу кэрэ күн, «Үөрүү» оҕо дьоҕурун сайыннарар киин уонна «Айылгы» норуот айымньытын дьиэтин үлэһиттэрэ кыттыылаах, «Алиса в стране чудес» остуоруйаннан саҕаламмыта. Олус интэриэһинэй, сэргэх көстүүнү көрдүбүт. Оҕолор оруолларын үрдүк таһымнааахтык толордулар, улахан артыыс курдук туттан-хаптан оонньоотулар, сөхтөрдүлэр.
Күүтүүлээх-кэтэһиилээх ыалдьыппыт Чысхаан оҕонньор сиэн кыыһынаан Хаарчааналыын ыалдьыттаан аастылар, минньигэс кэһиилэринэн оҕолору күндүлээтилэр.
Түмүгэр, уоттаах-күөстээх сынньалаҥҥа сэргэх оонньуулары оонньоон дуоһуйа үҥкүүлээтибит, сэргэхсийдибит. Бу күн оҕолор да учуталлар да астынан тарҕастылар. Өттүк харалаах, кэһии кыбыныылаах дьиэлээтилэр.
Кэлбит 2026 сылга өссө да элбэх ситиһиилэр кэлэ турдуннар диэн баҕара хаалабын!
Арианна Макарова, 11 кылааһын үөрэнээччитэ, С.А. Новгородов аатынан Чурапчы орто оскуолата