Дьулустаан Павлов — Саха сирин биир саамай биллиилээх, талааннаах уонна чаҕылхай фокусник-иллюзиониһа. Кини араас таһымнаах шоулары: хаартыттан саҕалаан, улахан сыанаҕа көрдөрүллэр уустук фокустарга тиийэ оҥорор.
Дьулустаан Саха сирин араас муннугар ыытыллар кэнсиэрдэргэ, ыһыахтарга, корпоративтарга уонна бырааһынньыктарга куруук ыҥырыылаах ыалдьыт буолар. Көрөөччүлэр кинини олус аһаҕаһын, юмордааҕын уонна сыанаҕа бэйэтин олус итэҕэтиилээхтик тутарын иһин сөбүлүүллэр. Кини хас биирдии тахсыыта дьиҥнээх аптаах шоуга кубулуйар.
Тохсунньу 16 күнүгэр оҕо сааһа ааспыт төрөөбүт нэһилиэгэр, Маарга, бар дьонугар «Алгыс» норуот айымньытын киинигэр «Магия Дьулустана Павлова» шоутун көрдөрдө. Кинини кытта доҕотторо-атастара күүс-көмө буоллулар. Нэһилиэгин дьоно махтанан, сэмэй бэлэхтэрин туттардылар.
Түгэнинэн туһанан Дьулустаантан кылгас ыйытык:
— Дьулустаан, дорообо! Фокус эйгэтигэр хайдах кэлбиккиний?
— Барыгытыгар дорообо! Фокус эйгэтигэр мин аан бастаан телевизорга Динамо диэн фокуснигы көрөн баран саҕалаабытым. Боростуой фокустары Маар библиотекатыттан «Иллюзионология» диэн кинигэни ааҕаммын үөрэммитим.
— Маҥнайгы көрдөрбүт фокускун өйдүүгүн дуо?
— Өйдүүбүн. Маҥнайгы фокустарым бытархай харчынан, биһилэиҕнэн, резинкаларынан уонна испиискэнэн буолааччылар.
— Сыанаҕа таҕыстаххына туох эмэ табыллыбакка хаалбыт түгэннэрэ бааллар дуо?
— Оо, элбэх буоллаҕа. Сыанаҕа тахсан баран, долгуйаммын сыыһа саҥаран кэбиһэр эбэтэр долгуйан хаартабын сиргэ түһэрэр түгэннэрим бааллара. Табыллыбат фокустар эмиэ элбэх буолааччылар.
— Саамай улахан баҕа санааҥ ханнык? Ханнык сыанаҕа тахсыаххын баҕараҕын?
— Саамай улахан баҕа санаам диэн Америкаҕа, Лас-Вегаска бэйэм «Дьулустаан Павлов» диэн шоубун көрдөрүөхпүн баҕарабын.
— Эппиэтиҥ иһин махтал, үрдүк ситиһиилэри баҕарабын!
— Эһиэхэ махтал!
Талааннаах Дьулустан Павловка биһиги аптаах, дьиктилээх айар үлэҕэр саҥа үрдэллэри, чаҕылхай кыайыылары уонна муҥура суох ситиһиилэри баҕарабыт! Дьону сөхтөрөр, киһи эрэ барыта кыайбат дьиктилэри оҥорор ураты талааның өссө сайда, чэчирии турдун! Айар үлэҥ өрүү дьону сөхтөрө, үөрдэ турдун!
Александр ФЕДОРОВ,
К.Д. Уткин аатынан Марха орто оскуолатын 11 кылааһын үөрэнээччитэ,
«Уткин сонуннара» медиа-киин эдкора.
keskil14.ru