Саҥа үүммүт 2026 сыл тохсунньу 12-14 күннэригэр Дьокуускай куоракка XXX-с сылын В.П. Ларионов аатынан «Инникигэ хардыы» үөрэнээччилэр научнай-практическай кэмпириэнсийэлэрэ киэҥ тэрээһиннээхтик ыытылла турар. Тэрээһин бастакы түһүмэҕин ыытыллар сиринэн «Триумф» успуорт уораҕайа талыллыбыта. Бу баараҕай уораҕай кыттааччыларга, экспертэргэ уонна ыалдьыттарга билим эйгэтин кытта алтыһыыга сылын ахсын табыгастаах сиринэн буолар.
Кэмпириэнсийэ бастакы күнэ олус көдьүүстээхтик уонна ураты сонуннук ааста. Үлэ сарсыарда эрдэттэн саҕаламмыта: бэлиэр 8:30 чаастан кыттааччылар бэлиэтэнэн, тылларын бэлэмнэнэн, эппиэтинэстээх тургутууга туруммуттара. 11 чаастан экспертнэй хамыыһыйа үлэлэри көрөн, сыаналаан барбыттара. Салгыы кэмпириэнсийэ үөрүүлээх арыллыыта буолбута. Быйылгы тэрээһин ураты суолталаах. Тоҕо диэтэххэ, үбүлүөйдээх отутус төгүлүн ыытыллар. Бу бэлиэ түгэҥҥэ анаан Саха Өрөспүүбүлүкэтин Ил Дархана Айсен Николаев кэлэн, тыл этиитэ кэмпириэнсийэ таһымын уонна суолтатын өссө үрдэттэ.
Бүгүҥҥү күн чэрчитинэн бастакы түһүмэх — стендэнэн көмүскээһин — ситиһиилээхтик түмүктэннэ. «Нуучча филологията» сиэксийэҕа ураты болҕомто уурулунна. Барыта 47 үөрэнээччи араас тиэмэлээх чинчийэр үлэтин билиһиннэрдэ. Манна дириҥ ис хоһоонноох уонна сонун чинчийиилэри таһынан, үлэ тиэмэлэрэ аныгылыы көрүүлээхтэрэ кэрэхсэттэ. Холобура: «НВК “Саха” ханаалыгар реклама тылын үөрэтии», «Аат иһигэр кистэммит таайбараҥнар», «Саха Есенина: поэтика уратылара», «Оҥоһуу өй — литератураҕа: буортулаах дуу, туһалаах дуу?» уонна да атыттар. Бу үлэлэр нуучча тыла уонна литэрэтиирэтэ култуураны, медианы уонна технологияны кытта ситимнээх, куруук сайда турар аныгылыы көрүүлээх билим эйгэтэ буоларын өссө төгүл көрдөрдүлэр, бигэргэттилэр. Көмүскээһин кэмигэр хас биирдии кыттааччыга тыл этэригэр 5 мүнүүтэ уонна ыйытыыларга хоруйдууругар 2 мүнүүтэ бэрилиннэ. Сиэксийэҕэ түөрт эксперт үлэлээтэ. Кинилэр дакылааттары истэн, чуолкайдыыр ыйытыылары биэрдилэр уонна идэлээх дьон сиэринэн кэккэ сүбэлэри эттилэр.
«Инникигэ хардыы» кэмпириэнсийэҕэ кыттыы үөрэнээччилэргэ улахан туһаны аҕалар. Ол курдук, бастатан туран, улахан эппиэтинэһи ирдиир: оҕолор научнай литэрэтиирэни дириҥник ааҕан билсэллэр, тиэкистэри ырыталлар, чинчийии ыыталлар уонна бэйэлэрин түмүктэрин оҥорорго үөрэнэллэр. Иккиһинэн, чинчийэр дьоҕуру, ырытар өйү (критическэй толкуйу), дьон иннигэр саҥарар уонна бэйэ санаатын дакаастыыр сатабылы сайыннарар. Ону таһынан, кэмпириэнсийэ үөрэнээччилэр инники идэлэрин талалларыгар олук уурар, көмөлөһөр.
Тэрээһин үрдүк таһымҥа ыытылынна: регламент чопчу тутуһулунна, волонтёрдар уонна экспертэр биир ситимнээхтик үлэлээтилэр, «Триумф» киинэ олус табыгастаах буолла. Бастакы күн кыттааччылар үчүгэй бэлэмнээхтэрин, тиэмэлэр суолталаахтарын көрдөрдө. Инникитин оҕолору саҥа түһүмэхтэр, арыйыылар уонна күүтүүлээх үлэ түмүгэ, саҥа сыалы-соругу туруорунуу күүтэр.
«Инникигэ хардыы» кэмпириэнсийэ кыттыылаахтара санааларын үллэстэллэр:
Айыына Степанова, IX кылаас,
И.Г. Тимофеев аатынан Майа лиссиэйэ.
keskil14.ru