Ахсынньы 23 күнүгэр, Дьокуускай куорат бастакы нүөмэрдээх оскуолатыгар Татьяна Власьевна Сергеева – нуучча тылын уонна литературатын учуутала, «Гордость Якутии» народнай премия «Учуутал» номинациятын кыайыылааҕа (2019 с.), Саха республикатын үөрэҕириитин туйгуна авторскай семинара буолан ааста. Тэрээһиҥҥэ нуучча тылын уонна литературын учууталлара кыттыыны ылбыттара.
Татьяна Власьевна биһиги оскуолабытыгар учууталынан үлэлээбитэ ыраатта, оттон уопсай педагогическэй стаһа отуттан тахса сыл! Кини үөрэх программатыгар киирбит «Арттерапия» диэн аныгы хайысха автора уонна көҕүлээччитэ буолар. Бу хайысха психология, искусство уонна педагогика салааларын кытта ыкса сибээстээх. Ол иһин даҕаны кини уруоктара куруук наһаа интириэһинэй, ураты буолаллар. Холобура, урокка ханнык айымньыны бара сылдьарбытыттан көрөн араас сыаҥкалары туруорабыт, ардыгар бэйэбит айбыт айымньыларбытынан даҕаны сыаҥканы оонньооччубут.
Ол семинарга биһиги, Х-с кылаас үөрэнээччилэрэ кыттааччылар иннилэригэр XIX үйэтээҕи нуучча баала хайдах быһыылаахтык барарын ойуулаан көрдөрбүппүт. Бэлэмнэнии хас да нэдиэлэ барбыта. Кыргыттар уһун былааччыйалаахтар, уолаттар бары хара фрактаахтар. Семинар иһинэн Татьяна Власьевна биһиги класспытыгар Андрей Платонов «Третий сын» айымньытынан уруок ыытта. Куруук буоларын курдук, олус интириэһинэй уруок ааста.
Этиэхпин баҕарабын, биһигини маннык киэҥ билиилээх, аныгылыы көрүүлээх учуутал үөрэтэриттэн наһаа астынабыт уонна үөрэбит. Татьяна Власьевна көннөрү уруогу ыыппат, кини толкуйдуурга, айымньыны уонна ол саҕанааҕы бириэмэни, дьону уонна дьон быһыыларын өйдүүргэ үөрэтэр. Интириэһинэйэ диэн, кини ийэтэ Мария Васильевна саха тылын учуутала эбит.
Артем Менкяров, X кыласс,
Дьокуускай куорат 1 №-дээх орто оскуолата