Ахсынньы ыйын 6 күнүгэр Буор Сыһыы нэһилиэгэр Н.А.Брызгалов аатынан Индигир орто оскуолатын 70 сылын бэлиэтиир өрөгөйдөөх үбүлүөйэ үрдүк таһымнаахтык буолан ааста.
Индигир нэһилиэгэр 4 кылаастаах оскуола 1955 сыллаахха аһыллыбыта. Быйыл орто оскуолабыт номнуо 35-с выпуһун олох киэҥ аартыгар үктэннэрдэ.
Тэрээһин чэрчитинэн «Үбүлүөйгүнэн, үөрэммит кыһабыт!» диэн үөрүүлээх линиэйкэ буолла. Үбүлүөйбүт үөрүүлээх чааһын оскуолабыт дириэктэрэ Никифоров Илья Васильевич эҕэрдэ тылынан саҕалаата. Дохсун ытыс тыаһынан оскуола бастакы үөрэнээччилэригэр уонна орто оскуола бастакы выпускниктарыгар өрөгөйдөөх үбүлүөйүнэн сибээстээн өйдөбүнньүк бэлэх туттарылынна. Н.А.Брызгалов дьиэ кэргэнэ олохтообут стипендияларын, туоһу суруктарын бүтүн Арассыыйатааҕы «Көмүс күһүн» 27-с агропромышленнай быыстапка кыайыылаахтарыгар биология уонна математика учууталларыгар С.Д. Атласоваҕа, А.В. Черемкинаҕа туттарда.
Үбүлүөй ураты чаҕылхай түгэнэ Бүтүн Арассыыйатааҕы «Көмүс күһүн» 27-с агропромышленнай быыстапка кыайыылаахтарын Атласова Светлана Дмитриевнаны уонна Черемкина Ангелина Витальевнаны кытта көрсүһүү, дегустация буолан ааста. Ыалдьыттар оҥорон таһаарбыт бородууксуйаны олус сэргээтилэр.
Н.А.Брызгалов аатынан Индигир орто оскуолата, Муома улууһа
keskil14.ru