Ахсынньы 23 күнүгэр Ил Дархан Айсен Сергеевич Николаев Ил Түмэҥҥэ Анал этиитин оҥорбутун болҕомтобун ууран иһиттим. Бастаан олус улахан, мин өйүм кыайан тиийбэт сирэ дии санаабытым, ол эрээри, Ил Дархан тылларыгар онус да, уон биирис да кылаас оҕото, уопсайынан, эдэр ыччат кэскиллээх олоҕо саҕыллар кэриэтэ өйөбүлүн уонна эрэлин көрдүм.
Ил Дархан саҥа дьиэлэри тутуу туһунан кэпсээбитэ миигин сүрдээҕин долгутта. Кэлин үөрэҕи бүтэрэн баран, дойдум Саха сиригэр олохсуйан, бэйэм дьиэлэнэн, дьиэ кэргэни тэрийиэхпин баҕарабын. Ол иһин, дьиэ тутуутун саҥа рекорда — бу эдэр ыччат кэскиллээх олоҕор олус улахан тирэх уонна кэнэҕэски саҕах дии саныыбын. Аҕыйах сылынан мин курдук эдэр дьон үөрэнэн-бииттэнэн кэллэхтэринэ, кинилэр иннилэригэр саҥа дьиэлэр ааннара аһыллыахтара, ол — олус үчүгэй.
Ону таһынан, Айсен Сергеевич бэлиэтээбит табахтааһыны уонна арыгыны бобуу, успуорду, чөл олоҕу тупсарыы диэн соруктара, биһиги, эдэр ыччат, доруобуйалаах буоларбытыгар улахан оруолу оонньуур. Чэбдик олох – үйэлээх олох диэн этэллэр. Ытыктабыллаах Ил Дархаммыт бу тылларын, дьон доруобуйатын туһугар олус күүһүрдүөхтээх дии саныыбын. Оччоҕо кэнэҕэс өрөспүүбүлүкэбит бөҕө доруобуйалаах, күүстээх ыччаттаах буолуоҕа.
2026 сылга бүддьүөт дохуотун үрдэтии туһунан саҥа былааннар үөрэххэ, доруобуйаҕа уонна социальнай эйгэҕэ улахан болҕомтону ууруллубутуттан олус үөрдүм. Мин үөрэхпэр бу туох да кэриэтэ күүс-көмө буолар. Үөрэҕим кэнниттэн дойдум туһугар үлэлиэхпин баҕарабын, ол үлэбэр маннык өйөбүл баара олус кэрэхсэбиллээх. Бу барыта биһиги, ыччаттар, инники кэскилбит сырдык буоларыгар олук буолар.
Саҥа технологиялары киллэрии, дьаһалта үлэтин тупсарыы – бу биһиги олохпутун өссө чэпчэки буоларыгар туһалаах. Мин Ил Дархаммыт маннык чуолкай соруктары туруорбутуттан ураты сэргээтим. Бу кэлэр кэмҥэ үлэ-хамнас өссө таһаарыылаах буолуо, дьон олоҕо өссө үчүгэй өттүгэр уларыйыа диэн эрэнэбин.
Ил Дархан Анал этиитэ миэхэ, эбэтэр мин саастыылаах оҕолорго, инникигэ эрэли — эрчими биэрдэ. Эрэлим күүстээх. Саха сирэ, бука бары бииргэ үлэлээтэхпитинэ, өссө күүскэ сайдыаҕа. Инникитин Анал этиигэ эдэр ыччакка сыһыаннаах боппуруостар өссө киэҥник ырытыллыахтара дии саныыбын. Махтал!
Иванна МОРДОВСКАЯ, ХI кылаас
Ой орто оскуолата, Ханалас