Ахсынньы 23 күнүгэр күнүс 12 ч. Саха Өрөспүүбүлүкэтин Ил Дархана Айсен Сергеевич Николаев Ил Түмэн Судаарыстыбаннай Мунньаҕар Анал этиитин оҥордо. Буоларын курдук, быһа эпииргэ көрдөрдүлэр. Дойдуга уонна өрөспүүбүлүкэбитигэр судургута суох сыл түмүгэр кэлэр сылга сүрүн соруктары иһитиннэрдэ. Анал этии тэрээһинэ 1 №-дээх Бырабыыталыстыба дьиэтигэр Өрөспүүбүлүкэ саалатыгар буолла. Быһа эпиири «Саха» НКИХ ханаалыгар, араадьыйаҕа, Ил Дархан социальнай ситимнэригэр көрдөрдүлэр, иһитиннэрдилэр.
Степан Кузьмич Макаров аатынан Чурапчы гимназиятын «Тумус кыһа» медиа-киин юнкордара Ил Дархан Анал этиитин көрдүбүт. Олохпут бары эйгэтин хабан үгүс үлэ ыытыллыбытын сөҕө иһиттибит. Холобур, сыл саҕаланыытыгар Саха сиригэр туризм сайдыытын туһунан стратегия оҥорбуттар эбит. Элбэх киһи Саха сирин киэҥник билэрин туһугар араас үлэни ыыппыттар.
Үүнэр 2026 сылы Ил Дархан Култуура сылынан биллэрдэ. Саха норуотун култууратын уонна историятын нэһилиэстибэтин үйэтитэр сыаллаах-соруктаах үлэлэр ыытыллаллара былааннанарын иһитиннэрдэ.
Анал этии түмүгүнэн Чурапчы улууһун олохтоохторун санааларын үллэстэллэригэр көрдөстүбүт.
***
Айталина Михайловна Смирникова, Е.А. Борисов аатынан Чурапчытааҕы библиотека-архыып дириэктэрэ:
– Үүнэр сыл Култуура сылынан биллэриллибитин үөрэ иһиттибит. Култуура эйгэтигэр, дьон-сэргэ култуурунай өйүгэр-санаатыгар көхтөөх сыл буолуо диэн күүтэбит. Чуолаан Чурапчыбыт улууһугар култуура, духуобунас эйгэтигэр улахан болҕомто ууруллан элбэх үлэ ыытыллыа диэн эрэнэбит.
***
Анна Петровна Ховрова, С.К. Макаров аатынан Чурапчы гимназиятын дириэктэрин сүбэһитэ:
– Биһиги Сахабыт сирин аҕа баһылыга Айсен Сергеевич Николаев быһа эпиирин сэҥээрэн көрдүм. Ол курдук, бэлиэтээн этиэхпин баҕарабын, биһиги Арассыыйабыт сүрдээх киэҥник сайдан иһэр эбит буоллаҕына, өрөспүүбүлүкэбитигэр эмиэ олох бары хайысхата тэтимнээхтик сайдар. Холобур, оҕо посуобуйатыттан саҕалаан Саха сириттэн көмө бөҕө кэлэр. Хамнас сыыйа-баайы үрдээһинэ биһиги олохпут тупсарыгар улахан суолталаах.
Биллэн туран, билиҥҥи тыҥааһыннаах кэмҥэ, хас биирдии киһиэхэ патриотизм өйө-санаата киириитэ, бу биһиги олохпут инники сайдыыта уонна тирэҕэ буолар. Ил Дархан төрөөбүт дойдуга тапталга сыһыаннаах этиилэрин сөбүлүү иһиттим. Онон сиэттэрэн туризм сайдыытын сэҥээрдим. Туризм омук быһыытынан уратыбытын, итэҕэлбитин, култуурабытын атын омук таһымыгар тэҥҥэ тутан сайыннарыы уонна киэҥ эйгэҕэ таһааран билиһиннэрии биир улахан хайысхата буолар.
***
Сергей Сергеевич Абрамов, С.К. Макаров аатынан Чурапчы гимназиятын учуутала:
– Туруоруллубут былааннар олоххо киирэн иһэллэрин үөрэ иһиттим. Биһиги өрөспүүбүлүкэбит Арассыыйа атын регионнарыттан хаалсыбакка, өссө сорох регионнары экономика, аныгы технология өттүгэр баһыйар кыахтаах. Онтон мин наһаа үөрэбин. Бэйэбит сирбит баайын сайыннарыыга, ону сөпкө туһанарга элбэх үлэлэр ыытыллыбыттар. Ону таһынан эдэр ыччаттарбытын үөрэхтээһин хайысхатыгар эмиэ киэҥ хабааннаах үлэ ыытыллыбытын биһирээтим.
2026 сыл Култуура сылынан биллэрилиннэ. Биһиги сахалар бу сылга дириҥ култуурабытын, Саха олоҥхотун курдук аан дойдуга биллэр гына, өрө тутан инники күөҥҥэ киириэхпит диэн эрэнэбин. Үүнэр сыл үтүөнү түстээтин, бука барыбытыгар дьолу-соргуну бэлэхтээтин.
Биһиги быһа эпиири көрөн Сахабыт сирэ сайдыытын, олохпут уларыйыытын киэҥник биллибит. Төрөөбүт дойдубут салгыы сайдан, тупсан истин!
Кристина МИХАЙЛОВА, Таня НОВГОРОДОВА, Х кылаас,
«Тумус кыһа» медиа-киин, С.К. Макаров аатынан Чурапчы гимназията