Ахсынньы 5 күнүгэр, Майаҕа, В.П. Ларионов аатынан «Инникигэ хардыы» XXX эдэр чинчийээччилэр конференцияларын муниципальнай түһүмэҕэ буолла. Конференция сиэксийэлэрэ И.Г. Тимофеев аатынан лиссиэйгэ, В.П. Ларионов аатынан орто оскуолаҕа уонна Ф.Г. Охлопков аатынан орто оскуолаҕа ыытылыннылар.
Ф.Г. Охлопков аатынан Майа орто оскуолатыгар уопсайа 188 кыттааччы , 33 эксперт, 10 араас секция ситиһиилээхтик үлэлээбитэ.
Генеалогия (орто уонна улахан кылаастар) уонна Историческай наукалар (улахан кылаастар) секцияларыгар уопсайа 3 эксперт буолан 22 үлэни иһиттибит. Олус интэриэһинэй уонна кэрэхсэнэр үлэлэр баалларын бэлиэтээн көрдүбүт.
Ол курдук төрүччүгэ, дьиэ кэргэнин дьикти араспаанньаларын чинчийбит Бэдьимэ орто оскуолатын 5 кылааһын үөрэнээччитэ Эрсан Плюк, төрүччүтүн хаһыс да сылын кэҥэтэн чинчийэр Алгыс Попов бэйэтин илиитинэн тимиртэн харысхал оҥорбутун сэргии көрдүбүт. Дьиэ кэргэнигэр бэйэтин кэмигэр биллэр-көстөр деятель Кузьма Осипович Гаврилов олоҕун дириҥэтэн чинчийбит тиэлиги орто оскуолатын үөрэнээччитэ Милана Лукина үлэтин ситиһиилээхтик көмүскээбитэ.
Историческай наукаларга улахан үөрэнээччилэри иһиттибит. И.Г. Тимофеев аатынан Майатааҕы лицей 10 кылааһын үөрэнээччитэ Альберт Пивоваров Тойон Пономарев башнятын историятын, уратытын үөрэппит уонна башня макетын 3Д моделин оҥорон ситиһиилээхтин көмүскээтэ. Моорук орто оскуолатын 11 кылааһын үөрэнээччитэ Галина Павлова Аҕа дойду сэриитин кэмигэр Моорук нэһилиэгэр сут сыллар, колхуос бэрэссэдээтэлэ тыылга үлэлиир дьону хоргуйууттан быыһаабытын туһунан чинчийбит. Ахтыылары хомуйан хомуурунньук оҥорбут уонна нэһилиэк уулуссаларыгар тыылга үлэлээбит дьону үйэтиигэ аналлаах бырайыак толкуйдаан олоххо киллэрбит. Баатара орто оскуолатын 11 кылааһын үөрэнээччитэ Георгий Новиков «Кыайыы маһа» бырайыагын туһунан кэпсээтэ. Сэрии кэмигэр Баатара нэһилиэгиттэн барбыт буойуттары сайтка киллэрбит, бу сайтка буойун ханна төрөөбүтэ, сулууспалаабыта суруллубут. Мас макета уонна мас бэйэтэ Баатара орто оскуолатыгар турар эбит.
Үлэлэрин көмүскээбит оҕолор бары экспертартан инники чинчийиилэригэр туһааннаах сүбэлэри ыллылар. Кыайыылаахтар дипломнарынан наҕараадаланнылар.
Генеалогия түмүгэ:
Лауреат — Попов Алгыс, 10 кылаас, Төхтүр орто оскуолата
1 истиэпэннээх диплом — Лукина Милана, 6 кылаас, Тиэлиги орто оскуолата
2 истиэпэннээх диплом — Иванов Владимир, 7 кылаас, Аллараа Бэстээх орто оскуолата
2 истиэпэннээх диплом — Гоголев Семен 8 кылаас, И.Г. Тимофеев аатынан Майа лиссиэйэ
3 истиэпэннээх диплом Плюк Эрсан, 5 кылаас, Бэдьимэ орто оскуолата
3 истиэпэннээх диплом Саввина Алиса, 6 кылаас, Ф.Г.Охлопков аатынан Майа орто оскуолата
3 истиэпэннээх диплом Стручков Максим, 6 кылаас, В.П. Ларионов аатынан Майа орто оскуолата
Историческай наукалар (улахан кылаастар) түмүгэ:
Лауреат — Павлова Галина, 11 кылаас, Моорук орто оскуолата
1 истиэпэннээх диплом- Новиков Георгий 11 кылаас, Баатара орто оскуолата
2 истиэпэннээх диплом — Пивоваров Альберт 10 кылаас, Майа лиссиэйэ
2 истиэпэннээх диплом — Иванов Алквиад, 11 кылаас, Майа лиссиэйэ
3 истиэпэннээх диплом — Елисеев Диодор, 10 кылаас, Р. А. Бурнашов аатынан Табаҕа орто оскуолата
3 истиэпэннээх диплом -Чикальдина Сандаара, 10 кылаас, Төхтүр орто оскуолата
Виктория Колодезникова, Кристина Иванова
Хаартыскаҕа түһэрдэ: Айтал Самыров, 6 кылаас, Ф.Г. Охлопков аатынан Майа орто оскуолата,
Түмэн медиа киин эдэр кэрэспэндьиэнэ
keskil14.ru