Ньурба улууhун Николай Николаевич Чусовской аатынан Антоновка орто оскуолатыгар үөрүүлээх күөх харыйа сандаарда.
Ахсынньы ый саҕаланыыта – Саха сирин олохтоохторугар саҥа эйгэни арыйар, дьиктилээх кэми бэлиэтиир кэрэ кэм. Ахсынньы 1 күнүгэр өрөспүүбүлүкэбит биир кэрэ сиригэр, Антоновка орто оскуолатыгар, улахан дьоро бырааһынньык буолла. Манна «Кыһын Саха сириттэн саҕаланар» диэн өрөспүүбүлүкэтээҕи акция чэрчитинэн, Харыйа Тыгыыта диэн тэрээһин үрдүк таһымнаахтык ыытылынна.
«Кыһын Саха сириттэн саҕаланар» бырайыак – Аан дойдуга Сахабыт сирин тымныы олус кэрэтин, уратытын билиһиннэрэр, саха омугун тыйыс айылҕаны кытта ыкса ситимнээҕин көрдөрөр, туризмы сайыннарар уонна кыһын кэрэтин сыаналыырга ыҥырар дьоһуннаах үлэ. Бу акция сүрүн сыала – тымныы биһиги уратыбыт, бэлиэбит диэн ылыныы, кинини хайгыы үөрэнии. Антоновка оскуолата бу бырайыакка кыттыыта – ыччаты төрөөбүт дойдуларын айылҕатын таптыырга, киэн туттарга үөрэтиигэ улахан оруолу ылар.
Оскуола тиэргэнигэр мустубут оҕолор, учууталлар, нэһилиэк олохтоохторо, ытыктабыллаах ыалдьыттар харыйа тыгыытын үөрүүлээх кэтэһиинэн күүттүлэр. Хас биирдии тыкпыт уот – эрэл, сырдык уонна үйэ-саас тухары умнуллубат кэрэ кэм бэлиэтэ буолла. Антоновка оскуолата «Кыһын Саха сириттэн саҕаланар» бырайыакка инникитин даҕаны актыыбынайдык кыттыаҕа. Оҕолор төрөөбүт дойдуларын айылҕатын, култууратын үөрэтэр, чинчийэр, Саха сирин атын олохтоохторугар билиһиннэрэр үлэлэрин салгыахтара. Хас биирдии харыйа тыгыыта – үйэлэргэ умнуллубат ураты кэм, Саха сирин кэрэ кыһынын үөрүүтүн кэрэһитэ.
Саха сирин кыһына – бу соҕотох тымныы эрэ буолбатах, бу кэрэ, дьиктилээх, күүстээх айылҕа, биһиги төрүт култуурабыт уонна үгэстэрбит биир тутаах чааһа. Бу бырааһынньык барыбытыгар Саха сиринэн киэн туттар, кэлэр кэскилгэ эрэллээх буолар күүһү биэрдэ. Уруй-айхал!
Потапова Юлия, XI кылаас, Н.Н. Чусовской аатынан Антоновка орто оскуолата, Ньурба