Биһиги дойдубут Саха сирэ. Саха сирэ элбэх баайдаах, кэрэ сирдэрдээх. Төрөөбүт сирбит Улахан Аан. Улахан Ааҥҥа киирдэххэ, Александр Самсонов-Айыы Уола пааматынньыга көрсөр. Биһиги үрдүк таас хайа үрдүгэр олоробут, мантан Өлүөнэ эбэ көстүүтэ олус үчүгэй.
Улахан Аан ураты кэрэ сирдэрдээх, сылаас, ыраас салгыннаах, дьикти көстүүлэрдээх. Киэҥ, ыраас уулаах Өлүөнэ эбэлээхпит. Үрдүк таас хайалардаах, алаастардаах. Сайынын от үлэтэ оргуйан турар. Кыһынын ынаҕы-сүөһүнү көрөллөр. Дойдубутугар киһи сынньанар элбэх айылҕа маанылаабыт сирдэрэ бааллар, ол курдук Таҥара уола кылыйбыт сирэ, Чуопчаар хайата, Илин Хайа, экопарк, Кыччыгый Аан.
Улахан Аан үтүө, үлэһит дьоннордоох. Ханна да бардарбыт таптыыр, ахтар, саныыр сирбитинэн буолар. Олус кэрэ, чуумпу остуоруйа дойдутун курдук муус маҥан, тыбыс-тымныы кыһыннаах, куйаас, күннээх сайыннаах. Дьоллоох оҕо сааспыт ааспыт, өйбүтүгэр хатанан хаалбыт дьоллоох түгэннэрбит барыта төрөөбүт дойдубутун кытары сибээстээхтэр.
Богдан Слепцов, Эльдар Заитов, М.Е.Васильева аатынан 2 Малдьаҕар орто оскуолатын 8 кылааһын үөрэнээччилэрэ, “УОТ” медиакиин.
Владимир Григорьев хаартыскаҕа түһэриилэрэ