Галина Николаевна Бандерова – Чурапчы улууһун С.Д. Флегонтов аатынан Хадаар орто оскуолатын саха тылын уонна литературатын учуутала. Сэтинньи 25-26 күннэригэр ыытыллар саха тылын, литературатын уонна култууратын учууталларын өрөспүүбүлүкэтээҕи үһүс сийиэстэрин көрсө санаатын үллэстэригэр көрдөстүбүт.
Галина Николаевна этэринэн, саха тылын учуутала билиҥҥи кэмҥэ ордук улахан суолталаах уонна эппиэтинэстээх: «Урукку да өттүгэр оҕо төрөөбүт тылынан саҥарара, үөрэнэрэ улахан суолталаах этэ. Бүгүҥҥү күҥҥэ, сайдыы балысханнык бара турар кэмигэр, оҕо төрөөбүт тылын күүһүн, кыаҕын тирэх оҥостон бүтүн олоҕу олорор киһи киһитэ буолан тахсарыгар хаһааҥҥытааҕар даҕаны улахан ирдэбил турар дии саныыбын. Мин бэйэм төрөөбүт тылбынан кыра эрдэхпиттэн үчүгэйдик саҥарабын, ааҕабын, өйдүүбүн. Учуутал буолуохпун баҕаран тураммын бу идэни талбытым. Билигин идэбин толору баһылаан, саха тылын учуутала буоларбыттан астынабын. Оҕо төрөөбүт тылын билэ улаатарыгар тус эппиэтинэспин өйдүүбүн».
– Саха тылын үөрэтии олох сайдыытын кытта хаалсыбакка тэҥҥэ баран иһиэхтээх, – диэн этэр кини, – Үөрэтэр матырыйаалы билигин үксүн учуутал бэйэтэ оҥостор. Атын биридимиэттэр курдук, барыта бэлэм суох. Сылтан сыл үөрэтии чааһын аҕыйатар кыһалҕа баар. Аны учуобунньуктарбыт ФГҮӨС ирдэбилинэн, оҕо өйдүүрүгэр олус ыарахаттар, өйдөнүмтүөтэ суохтар. Олус научнай быһаарыылаахтар. Эрчиллиилэрэ да ыарахан.
Галина Николаевна уопуттаах учуутал быһыытынан, саха тылын уонна литературатын үөрэтиигэ бэйэтэ туттар ньымалардаах. Уруоктарыгар, дьарыктарыгар оҕо саҥарар саҥатыгар улахан болҕомтотун уурар. Маныаха араас көрүҥнээх үлэлэри оҥотторор.
– Холобур, хартыынанан кэпсээһин, тылы быһаарар тыл арааһын булларыы, тылдьытынан үлэ, тиэкиһи ситэрии, ыһыллыбыт тыллары, этиилэри таҥан, этии, тиэкис суруйуу. Маны таһынан, хоһоону элбэхтик аахтарбын. Уус-уран ааҕыыларга кытыннарабын.
Бу буолаары турар саха тылын, литератураны уонна култууратын учууталларын өрөспүүбүлүкэтээҕи үһүс сийиэстэригэр учуобунньук тутулугар судургутутар үлэни ыытыы уонна үөрэтии чааһын элбэтии эбэтэр оннунан хаалларыы боппуруостара быһаарыллыахтарын баҕарабын
– диэн Галина Николаевна Бандерова санаатын этэр.
Сардаана МАТВЕЕВА
keskil14.ru