Бүгүн оскуолабыт иитии чааһыгар дириэктэри солбуйааччы Борисова Оксана Ивановнаны кытта Анал байыаннай дьайыы кыттыылаахтарыгар аналлаах стендэ туһунан кэпсэттибит.
Анал байыаннай дьайыы буойуттарыгар аналлаах стендэни туруорбуккутун кэпсииргитигэр көрдөһөбүт.
-Бу “Биһиги геройдарбыт” диэн стендэни 2025 сылы Россияҕа Аҕа дойдуну көмүскээччи сылынан биллэриллибитигэр арыйбыппыт. Ону Арассыыйа үгүс оскуолаларыгар “Биһиги дьоруойдарбыт”, “Дьоруой паартата” диэн акциялар ыытыллыбыттара. Ол курдук, бу стендэҕэ баар геройдары оҕолор бары үөрэппиттэрэ, билэллэр-көрөллөр. Стендэбитигэр биһиги төрөппүттэрбит, выпускниктарбыт уонна оскуолаҕа сыһыаннаах бэйэбит геройдарбытын киллэрбиппит.
Мин Егоров Дмитрий Николаевич туһунан кэпсиэхпин баҕарабын. Кини кэргэнэ биһиэхэ кэлэн аҕаларын туһунан элбэх интэриэһинэй матырыйаалы биэрбитэ. Биһиги оскуолабытыгар кини икки уола үөрэнэр. Аҕалара бу анал байыаннай операцияҕа бэйэтин олоҕун толук биэрэн туран хорсуннук кыттыбытын туһунан үөрэнээччилэрбитигэр сырдатабыт. Өссө Дмитрий Николаевич сырдык аатыгар анаан дьоруой паартатын туруорбуппут. Биһиги оскуолабыт ол өттүгэр выпускниктара олус көмөлөһөллөр. Холобур, бу ыраах соҕуруу куораттан Андрей Константинович Пирскэй эбии материаллары ыыппыта. Ону оҕолор ааҕан, үөрэтэн баран, биһиги выпускниктарбытын стендэбитигэр эбии киллэрбиппит. Манна куйаар кодунан киирэн выпускниктарбыт туһунан информацияны булуохха сөп. Дьоруойбут стендэтэ уларыйа, саҥардылла турар. Кэлин биһиги выпускникпыт, 17 нүөмэрдээх орто оскуолатыттан Неустроев Альберт Петрович диэн анал байыаннай операцияҕа баран олоҕун уурбут эдэркээн оҕо туһунан эмиэ киирбитэ, сырдатыллыбыта.
Оксана Ивановна, биһиги оскуолабытыгар Анал байыаннай дьайыы кыттыылаахтарын дьиэ кэргэттэригэр туох көмө оҥоһулларый?
-Билиҥҥи туругунан Анал байыаннай дьайыы кыттыылаахтарын дьиэ кэргэттэриттэн оскуолабытыгар барыта 55 оҕо үөрэнэ сылдьар. Оҕолору барыларын билэбит. Учууталлар, социальнай педагогтар, кылаас салайааччылара сыл аайы биирдиилээн барыларыгар дьиэлэригэр сылдьан, кинилэр хайдах усулуобуйаҕа олороллорун, оскуолаҕа хайдах сылдьалларын, үөрэнэллэрин, аһыылларын көрөн көмөлөһөбүт. Оскуола бары үлэһиттэрэ кэтээн, көрөн-истэн сылдьан тэҥҥэ үлэлэһэллэр. Кинилэр дьиэ кэргэттэрин кытта биһиги ыкса сибээһи тутабыт. Бырааһынньыктарга, тоҕоос кэмнэргэ бэлэх оҥорон эҕэрдэлиибит. Холобур, былырыын саҥа дьылга АБДь буойуттарын оҕолорун эҕэрдэлээбиппит. Быйыл эмиэ Тымныы оҕонньор бэйэтин бэлэҕин утары уунуоҕа. Оҕолор сайыҥҥы сынньалаҥнарын туһалаахтык атааралларыгар лааҕырынан хааччыйабыт. Өссө да биирдиилээн эттэххэ, көмөнү бириэмэтигэр, тута төһө кыахпыт баарынан оҥоро сатыыбыт.
Кэлэр көлүөнэ ыччакка патриотизм, героизм диэн өйдөбүллэри өссө хайдах тиэрдиэххэ сөбүй?
-Биллэн туран, бу олус улахан күүстээх тыллар. Оҕону патриотическай иитии, мин санаабар, олох кыра сааһыттан саҕаланар. Дьиэ кэргэнтэн, бииргэ төрөөбүттэртэн, оскуолаттан, төрөөбүт алааскыттан, куораккыттан саҕаланар. Ол иһин биһиги оҕолорбутун барытыгар сыһыаран, төрөөбүт куораттарын таптыырга, киэҥ туттарга үөрэтэбит. Ону таһынан, араас далааһыннаах күрэхтэри ыытабыт. Холобурдаан эттэххэ, “Күөрчэх күрэҕэ”, “Байанай алгыһа”, “Туймаада уолана” диэн үгэскэ кубулуйбут киэҥ тэрээһиннэрдээхпит. Бу мероприятиелар оҕону патриотическай иитиигэ эмиэ сүҥкэн кылаат киллэрэллэр.
Дойдубутун көмүскүү, ыраас халлаан туһугар олохторун олук ууран туран, анал байыаннай дьайыыга сылдьар хорсун буойуттарбытын бары билэр буолуохтаахпыт .Эдэр корреспонденнарга түбүктээх үлэтиттэн бириэмэ анаан кэпсэппитигэр Борисова Оксана Ивановноҕа махталбытын тиэрдэбит.
Арина КОЛОДЕЗНИКОВА, Ангелина ПАВЛОВА,
Дьокуускай куоратын 17 № орто оскуолатын VII кылааһын үөрэнээччилэрэ,
«Сайдын» медиакиин эдэр корреспонденнара