Сэтинньи 14 күнүгэр биһиги Улахан Ааммытыгар «Оһуохай киэһэтэ» диэн улахан тэрээһин буолан ааста. Бу тэрээһиҥҥэ «Оһуохай» уонна «Күн дьоно» өрөспүүбүлүкэтээҕи түмсүүлэр кэлэн ыалдьыттаан бардылар. Тэрээһин сүрүн көҕүлээччитэ «Саха Боотур» уопсастыба салайааччыта, анал байыаннай дьайыы бэтэрээнэ – Андрей Юльевич Артамонов – Малдьаҕар Бөртө буолар.
Аан маҥнай ыалдьыттарбыт оскуолаҕа кэлбиттэрэ. 2 Малдьаҕар орто оскуолатын директора – Григорий Григорьевич Сысоев, оскуола коллектива уонна үөрэнээччилэрэ алаадьы уунан көрсүбүттэрэ. Оскуола коллективын алгысчыт алгыстаабыта. Ол кэнниттэн тоҥолохтон ылсан, улахан оһуохай тэрийбиттэрэ. Биһиги сахабыт үтүө үҥкүүтүн ытыктаан-маанылаан тураммыт оһуохайдаабыппыт. Ыалдьыттарбыт оҕолорго маастар-кылаастары ыыппыттара. Оскуола түмэлин көрбүттэрэ. Ол кэнниттэн ыалдьыттарбыт «Дьөһөгөй оҕото» түмэлгэ киирэннэр ыалдьыттаан, сүргэлэрэ көтөҕүллүбүт этэ.
Эбиэт кэннэ «Аан-Аартык» култуура киинигэр төгүрүк остуол тэриллибитэ. Бу төгүрүк остуол сүрүн сыала – «Бөртө оһуохайа» диэн өрөспүүбүлүкэтээҕи бырайыак тэрээһинин тула кэпсэтиһии. Култуура киинин үлэһиттэрэ уонна «Көмүлүөк» түмсүү эбэлэрэ алаадьылаах салаамаатынан, итии чэйинэн ыалдьыттары күндүлээбиттэрэ. Оһуохай туһунан элбэх кэпсээннэри кэпсээбиттэрэ. Элбэх ыйытыы, санаа үллэстиитэ баара. Мунньах ситиһиитинэн буолла – «Бөртө Оһуохайа» — өрөспүүбүлүкэтээҕи тэрээһин эһиил олунньуга Улахан Аан нэһилиэгэр ыытыллыа диэн быһаардылар. Нэһилиэк баһылыга Алексанр Степанович Алексеев бу бырайыагы өйөөбүтэ. Бу кэмҥэ биһиги былыргы саха боотурдарын таҥастарын кэппиппит. Бу кэнниттэн Саха өрөспүүбүлүкэтин култууратын туйгуна, үтүөлээх оһуохайдьыта – Антонина Саввична Алексеева биһиги оскуолабытыгар уонна «Көмүлүө» эбэлэр түмсүүлэригэр икки кырыымпаны бэлэх ууммута.
Бу тэрээһин кэннэ мин маннык түмүккэ кэллим. Саха норуота буоларбыт быһыытынан, төрүт оһуохайбытын ытыктыахтаахпыт-маанылыахтаахпыт, аатырдыахтаахпыт. Бу тэрээһини тэрийбит Андрей Юльевич Артамонов – Малдьаҕар Бөртөҕө, күүс-көмө буолбут култуура киинин үлэһиттэригэр, «Көмүлүөк» түмсүүгэ, «Күн дьоно» уонна «Оһуохай» түмсүүлэр үтүө ыалдьыт буолбуттарыгар улахан махтал.
Аман ЕРЕМЕЕВ, М.Е. Васильева аатынан 2 Малдьаҕар орто оскуолатын Х кылааһын үөрэнээччитэ, «УОТ» медиакиин,
Хаартыскаҕа түһэрдилэр: Эльдар ЗАИТОВ, XIII кылаас, Трифонова А.В., библиотекарь.
keskil14.ru