Сэтинньи 14 күнэ — саха литературатын төрүттээччилэриттэн биирдэстэрэ Анемподист Иванович
Софронов — Алампа төрөөбүт күнэ. П.А. Ойуунускай аатынан литература түмэлигэр 7 төгүлүн «Алампа» бириэмийэни үөрүүлээх быһыыга-майгыга туттарыы буолла.
Алампа 1935 сыллаахха алтынньы 22 күнүгэр Саха сиринээҕи сэбиэскэй суруйааччылар сойуустарыгар туһаайан, бэйтин литературнай нэһилиэстибэтиттэн киирбит үптэн сахалыы суруллубут дыраама бастыҥ айымньытыгар кини аатынан бириэмийэни олохтуурга кэриэс тылын этэн хаалларбыта. Алампа бириэмийэтэ 2018 сыллаахха олохтоммута. Билигин кини аатынан бириэмийэ суолтата кэҥээн аҥардас суруйууга эрэ буолбакка, туох баар айар-тутар, култуура уонна ускуустуба эйгэтигэр үлэлиир бастыҥ көрдөрүүлээх дьоҥҥо ананар.
Алампа бириэмийэтин быйылгы кыайыылаахтара:
«Уран тыл» — Корякина Ольга Николаевна — Умсуура
«Суруйааччы» — Решетникова Мария Афанасьевна- Арылы Дуйдаах
«Чаҕылхай артыыс» — Степан Федоренко
«Чаҕылхай артыыска» — Изабелла Васильевна Николаева
«Дэгиттэр Режиссер» — Прокопий Дмитриевич Неустроев
«Дархан ойууһут» — Надежда Егоровна Федулова
«Киинэ эйгэтин чыпчаал үлэһитэ»(«Кинематографист») — Михаил Лукачевскай
«Ырыа айааччы» — Алексей Потапов
«Идэтигэр сүдү бэриниилээх» — Августина Николаевна Филиппова
«Идэтигэр сүдү бэриниилээх» — Борис Федорович Неустроев — Мандар Уус
«Алампаҕа сүдү бэриниилээх» — Сивцев Василий Яковлевич
Решетникова Мария Афанасьевна- Арылы Дуйдаах:
— Бүгүн саха омукка хас да төгүл бэлиэ күн эбит. Улуу Алампа төрөөбүт күнэ, Амор Алексеев төрөөбүт күнэ уонна Саха сиригэр сүрэх эпирээссийэтэ 25 сыл аннараа өттүгэр сэтинньи 14 күнүгэр аан бастаан оҥоһуллубута. Ол иһин биһиэхэ медиссиинэ национальнай киинигэр бүгүн Сүрэх хирургиятын 25 сылын научнай практическай конференциянан бэлиэтии сылдьабыт. Бүгүн мин наһаа долгуйдум. Баҕар мин өбүгэлэрим биллэхтэринэ үөрбүттэрэ буолуо дии саныыбын. Тоҕо диэтэр, Тааттаттан төрүттэх эһэм Москваттан 1930 сыллаахха быраас үөрэҕин бүтэрэн кэлэр. Алампаны кытта чугастык билсэр этилэр уонна кинилэр иккиэн Өксөкүлээх Өлөксөйү өлөр ыарыытыгар ыарыылаабыт дьон буолаллар. Литература уонна медиссинэ маннык ситимнээхтэрин этиэхпин баҕарабын.
Августина Николаевна Филиппова:
— Наһаа соһуйдум уонна улахан махталбын тиэрдэбин. Бастакы маннык бэлиэм буолар. Ол аата мин үлэлиир үлэм өссө даҕаны уһууругар сылтах бэлиэ кэллэ. Ыһыахтарга бар дьоммун хонуу сибэккитин курдук киэргэтиэм этэ дии санаабыт баҕа санаам билигин туолла. Ол онтон олус үөрэбин.
Keskil14.ru