Сэтинньи 7 күнүгэр «Научное лето онлайн» (Билим онлайн сайына) ситиминэн республикатааҕы оҕолорго аналлаах бырайыак быйылгы сыллааҕы түмүк тэрээһинэ буолбута. Бу бырайыакка биһиги оскуолабыт «Экос» лааҕыр оҕолоро маҥнайгы 2020 сылыттан алтыс сылын кытынныбыт. Манна дьарыктаммыт оҕолор сыллата регионнааҕы, республикатааҕы уонна дойду таһымнаах научнай-практическай конференцияларга ситиһиилэнэллэр.
Мин иккис сылбын «Ботаника, флористическай чинчийиилэр» хайысханан биһиэхэ үүнэр дьааттаах үүнээйилэри үөрэттим. Бу үүнээйилэр бары эмтээхтэринэн биллэллэр. Кыра кээмэйдэрэ араас ыарыыга эмтээхтэр, онтон элбэх буоллаҕына сүлүһүнэ кутталланар. Онон билиэххэ, үөрэтиэххэ, сатаан туһанарга үөрэниэххэ наада.
Научнай салайааччыбыт Елена Ивановна Троева олус интэриэһинэйдик, өйдөнөр гына кэпсиир, араас дьикти чахчылары билиһиннэрэр. Сайыны быһа оҕолор ыйытыыларыгар барытыгар эппиэттиир, сүбэлиир. Ааспыт үөрэх дьылыгар Дьокуускайга, Москваҕа, Владивостокка конференцияларга ситиһиилээхтик кыттыбытым. Быйыл “Экос” лааҕыртан Лия Филиппова «Цифровая картография», Айгылаана Сивцева «Биотехнология плодово-ягодных растений Якутии», Андрей Аргунов уонна Влад Софронеев «Мерзлотоведение» хайысханан дьарыктанныбыт. Влад үлэтэ ирбэт тоҥноох сиргэ тутууга анаан олохтоох матырыйааллары көрдөөһүҥҥэ ананар. Быйылгы түмүгүнэн икки үлэ дипломунан бэлиэтэннэ, биир үлэ российскай куонкуруска кыттарыгар мэктиэлэннэ.
Учууталбыт Вера Николаевна Заровняева бу бырайыак улахан суолтатын туһунан маннык этэр: «Оҕо ханна да айаннаабакка бэйэтин дьиэтигэр олорон Сахабыт сирин араас улуустарын айылҕатын билсэр, улахан учуонайдар салалталарынан наука ньымаларынан үлэни саҕалыыр, атын оскуолалар оҕолорун уонна учууталларын туһунан өйдөбүллэнэр. Ольга Юрьевна Рожкова салалтатынан Өлүөхүмэтээҕи «ЦТРиГОШ” (Центр творческого развития и гуманитарного образования школьников) Саха сирин оҕолоругар аналлаах араас интэриэһинэй, оҕону сайыннарар бырайыактары тэрийэр. Онон тэрийээччилэргэ барыларыгар улахан махталлаахпыт “.
Карина Обутова, 10 кылаас, «Нуклеус» пост, Кэбээйи оскуолата