Сэтинньи 10 күнүгэр «Дьоһуннааҕы кэпсэтии» («Разговоры о важном») уруога «Сир быйаҥнаах, киһи сатабыллаах» диэн тиэмэҕэ ыытылынна. Үөрэнээччилэргэ селекция уонна генетика туһунан кылаас салайааччылара кэпсээтилэр. Уруок нуучча аатырбыт биолога, генетигэ, селекционера Иван Владимирович Мичурин 170 сылын көрсө ыытылынна.
Селекция уонна генетика туһунан уруок кэннэ оҕолортон санааларын иһиттибит.
Маргарита Гуляева, 8 кылаас үөрэнээччитэ:
— Интириэһинэй уруок буолан ааста. Арассыыйаҕа учуонай-селекционердар алта араас үүнээйилэри холбоон саҥа үүнээйи айан таһаараллар эбит. Холобур, биһиги Сахабыт сиригэр агроном М.А. Черткова 7 моонньоҕон суордун селекциялаан таһаарбыт. Олортон биирдэстэрэ «Хара Кыталык». Кини мин дьиэм таһыгар үүнэр, олус тулуурдаах, отоно хап-хара, мип-минньигэс буолар.
Илона Федорова, 3 кылаас үөрэнээччитэ:
— Генетика киһиэхэ улахан оруолу оонньуур эбит. Холобур, генетиканан оҕоҕо доруобуйата, талаана, өйө уо.д.а. бэриллэр эбит.
Евдокия Тобонова, 5 кылаас үөрэнээччитэ:
— Кыһын устата оҕуруот аһын үүннэрэр «Саюри» тэрилтэни биллим. Биһиги кыһын «Саюри» оҕурсууларын сиэччибит, ол онно үүнэр оҕурсуу эбит. Кинилэр оҕурсуу эрэ буолбакка помидор, клубника, салат эмиэ олордоллор. Билигин папайя уонна банан олордон боруобалыы сылдьаллар. Холобур, биһиги тымныы сирбитигэр олортуҥ да үүммэт эбит. Биһиги усулуобуйабытыгар үөрэнэллэрэ хас да сыл ааһыан наада эбит.
Гордей Неустроев, 4 кылаас үөрэнээччитэ:
— Селекциянан дьарыктанар наһаа ыарахан эбит. Учуонайдар баар буоланнар биһиги кылгас сайын устата араас үүнээйилэри үүннэрэн элбэх битэмиин хаһаанар эбиппит.
Онон селекция уонна генетика оруола олус улахан: араас усулуобуйаларга сайдар кыахтаах кыыллары иитэн, үүнээйилэри үүннэрэн таһаарыахха сөп.
Камелия Яковлева, «Юла» медиа-киин юнкора, Маар орто оскуолата, Ньурба.
keskil14. ru