Мин үөрэнэр оскуолам 1900 сыллаахха алтынньы 8 күнүгэр«Түннүк Анна» диэн сиргэ нэһилиэк баайа М.Н. Ларионов дьиэтигэр арыллыбыт. Бастакы учууталынан манна олохтоох, куорат Духовнай семинариятын бүтэрбит Афанасий Силин, попечителинэн үс сыл Семен Егоров, сэбиэдиссэйинэн аҕабыыт Георгий Черных үлэлээбиттэр. Бу оскуола церковнай-приходской оскуола дэнэрэ. Саҥа оскуола 1901 сыллаахха олохтоох кыанар баай дьон көмөтүнэн тутуллубут.
Оскуолабыт өрөспүүбүлүкэҕэ биллэр-көстөр баай, дириҥ историялаах оскуола буолар.
Кеша Алексеев
Ол курдук 1920-1929 сс. – «Единая трудовая советская школа», 1929-1932 сс. – «Якутская национальная образцовая опорная школа Наркромпроса», 1932-1937 сс. – «Образцовая школа Минпроса ЯАССР, центр научно-методической работы в республике», 1937-1960 сс. сэттэ кылаастаах, 1947 сыллаахха оскуолабытыгар биир дойдулаахпыт, Гражданскай сэрии Дьоруойа Кеша Алексеев аата инэриллибитэ, 1960-1974 сс. оскуолаҕа опытнай-семенной учаастак уонна өрөспүүбүлүкэҕэ бастакы уһатыллыбыт күннээх үөрэх арыллар, 1962- 1968 сс. «Опытно-экспериментальная школа АПНРСФР по обучению русскому языку в нерусской школе», 1969 сылтан үөрэнээччилэр производственнай биригээдэлэрэ тэриллибитэ, 1975 сыллаахха орто оскуола буолбута, 1993 сыллаахха «Республиканская экспериментальная площадка по дополнительному образованию», бу сыл «Уһуйаан» кылааһа арыллыбыта, 1993-1994 сс. Эльконин-Давыдов сайыннарыылаах үөрэҕин саҕалаабыта, 2004-2008 сс. «Экспериментальная площадка « Библиошкола» Российского института «Эврика», 2009 сылтан Агро хайысхалаах оскуола статуһун ылан ситиһиилээхтик үлэлии олорор.
Оскуолабыт арыллыаҕыттан кэрчик кэмнэрин көрдөххө, үксүн инники күөҥҥэ, саҥаттан
саҥаны киллэрэн бастыҥнар кэккэлэригэр сылдьар. Уонна араас кэмҥэ өрөспүүбүлүкэҕэ биллэр элбэх учууталлар үлэлээбиттэр. Ол курдук Н.В. Егоров, П.Н. Самсонов, Н.Е. Самсонова, Л.Н. Харитонов уо.д.а. чулуу учууталлар.
Эдэр көлүөнэ киэҥ, дириҥ историялаах оскуолабытынан киэн туттабыт. Төрөөбүт күҥҥүнэн, тапталлаах оскуолабыт!
Василена ДМИТРИЕВА, XI кылаас, «Кустук» медиа-студия,
Кеша Алексеев аатынан Хаптаҕай орто оскуолата, Мэҥэ Хаҥалас