Сэтинньи 1-8 күннэригэр, Норуоттар сомоҕолоһууларын күнүн көрсө өрөспүүбүлүкэҕэ Бүтүн Арассыыйатааҕы «Улахан этнография дьыктаана» ыытыллыаҕа. Быйыл үбүлүөйдээх 10 сылын ыытыллар. Арассыыйаҕа олорор араас норуоттар култуураларын, үгэстэрин, тылларын, историяларын билиһиннэрэр, ону тэҥэ норуоттар сомоҕолоһууларын бөҕөргөтөр сыаллаах.
Алтынньы 28 күнүгэр, өрөспүүбүлүкэтээҕи «Сахамедиа» медиакииҥҥэ Саха сиригэр «Улахан этнографическай дьыктаан» сүрүн тэрийээччилэрин кытта пресс-конференция ыытылынна.
Пресс-конференцияҕа кыттыыны ыллылар: Гаврил Витальевич Кириллин СӨ тас сибээһин уонна норуоттар дьыалаларын миниистирэ, Розалия Ефимовна Колосова А.Е. Кулаковскай аатынан норуоттар доҕордоһууларын дьиэтин генеральнай дириэктэрин солбуйааччы уонна Фаридун Олимджонович Хотамов Саха сирин норуоттарын Эдэр ыччатын Ассамблеятын бэрэссэдээтэлин солбуйааччы.
Гаврил Витальевич Кириллин,
— Сыллата буоларын курдук, дьыктаан быйыл икки форматынан ыытыллыаҕа: онлайн уонна очно. Дьокуускай куоракка 3 сүрүн былаһааккалар үлэлиэхтэрэ. Ол курдук, А.Е. Кулаковскай аатынан норуоттар доҕордоһууларын дьиэтэ, «Арассыыйа — мин историям» историческай музей, уонна тас дойдуттан кэлбит дьон адаптацияларын киинэ. Өрөспүүбүлүкэ үрдүнэн уопсайа 300 былаһаакка турара күүтүллэр. Онлайн оҥоруохтарын баҕалаахтар национальнаяполитика.рф сайтка киирэн толороллор. Дьыктаан 30 ыйытыыттан турар. Эппиэттииргэ 45 мүнүүтэ бэриллэр. Саамай үрдүк баал — 100. Дьыктаан түмүгэ ахсынньы 12 күнүгэр — Араассыыйа Федерациятын Конститутциятын күнүгэр биллиэҕэ. Барыгытын дьыктааҥҥа кэлэн көхтөөх кыттыыны ыларгытын ыҥырабыт.
Розалия Ефимовна Колосова,
— А.Е. Кулаковскай аатынан норуоттар доҕордоһууларын дьиэтэ этнографическай дьыктаан ыытыллар сүрүн былаһаакката буолар. Дьыктаан сэтинньи 4 күнүгэр 14:00 чаастан ыытыллыаҕа. Биһиги балаһааккабытыгар 100 киһи кэлэн суруйарын күүтэбит. Саха сиригэр олорор норуот, омук бэрэстэбиитэллэрэ национальнай таҥастарын кэтэн кэлэн дьыктааны суруйааччылар.
Фаридун Олимджонович Хотамов,
— Мин быйыл бу дьыктааҥҥа 5 сылбын кыттабын. Дьыктаан 30 ыйытыыта барыта олус интэриэһинэй. 20 ыйытыы Арассыыйа норуоттарыган кытта сибээстээх буолар уонна 10 ыйытыы Саха сирин норуоттарын туһунан буолар. Былырыын Дьиэ кэргэн сылыгар аналлаах ыйытыылар элбэх этилэр. Сабаҕалаан эттэххэ, быйыл Аҕа дойдуну көмүскээччи сылыгар аналлаах ыйытыылар кэлэллэрэ буолуо.
Дьыктаан туһунан сиһилии национальнаяполитика.рф саайтка ааҕыаххытын сөп.
Keskil14.ru