Үлэ – киһи олҕун киэргэлэ
Киһи аата-суола, ытыктабыла үлэтинэн кэлэр, үлэ киһини киэргэтэр. Хас биирдии нэһилиэккэ төрөөбүт сирин сайдыытыгар бэйэтин кылаатын киллэрэр үгүс дьон баар буолар. Бүгүн кэпсиир киһибит А.Е.Мординов аатынан лиссиэй тутаах үлэһитэ, технология үрдүк категориялаах учуутала, сылын аайы нэһилиэккэ ыытыллар «Сыл бастыҥ үлэһитэ» анал аат хаһаайката — Анисия Владимировна Кириллина.
Кини кимий?
Анисия Владимировна 1979 сыллаахха муус устар 2 күнүгэр Мотрена, Владимир Бэстиинэптэр дьиэ кэргэннэригэр төрдүс оҕонон күн сирин көрбүтэ. Анисия кыра эрдэҕиттэн ийэтин батыһа сылдьан араас дьарыкка уһуйуллубут. Ийэтэ талааннаах иистэнньэҥ, сатаабатаҕа диэн суох эбит. Анисия Владимировна 3 уол амарах ийэтэ, Айтал 1 куурус, онтон Айсен уонна Айхал биһиги оскуолабытыгар үөрэнэллэр. Кэргэнэ Сергей Сергеевич ПЧ – 7 начальнига.
Үөрэҕэ, идэтэ, үлэтэ.
Оскуоланы бүтэрээт Харбалаахтааҕы лиссиэйгэ тимиртэн араас оҥоһуктары оҥорор үөрэҕи туйгуннук бүтэрээт Намнааҕы педагогическэй кэллиэскэ киирэр. Салгыы Саха государственнай педагогическэй академиятыгар «учитель изобразительного искусства и диайна” үөрэнэн бутэрэн дойдутугар үлэтин саҕалыыр. Дипломнай үлэтин аатырбыт ийэ – олонхоһут Петр Решетников портретын уруһуйдаан үрдүк сыанабылы ылан биһирэбил сурук тутар. Анисия Владимировна бу уруһуй эйгэтигэр уһуйбут учууталын, наставнигын Гаврил Гаврилович Петров аатын убаастабыллаахтык ахта саныыр.
Анисия Владимировна үлэтигэр олус бэриниилээх, эппиэтинэстээх. Кини бэйэтин тус сатабылын үөрэтэр оҕолоругар иҥэрэр. Ураты ис хоһоонноох айар мастарыскыайдаах. Дьэ, онно оҕолор айаллар-туталлар. Холобура, бу соторутааҕыта ааспыт Манчаары оонньууларыгар анаан «Священные образы Таатты» — диэн коллекция айыллыбыта. Бу коллекция оҕолору сахалыы ураты тыыҥҥа киирэллэр, төрөөбүт Таатталарынан киэн туттарга угуйар.
Ситиһиилэрэ манныктар:
Анисия Владимировна учуутал үлэтэ быстыспат ситимнээх буолуохтаах, үөрэтэр предметигэр хайаан да оҕону тус сирдээн ситиһиигэ сиэтиэхтээх диир. Биһиги учууталбыт оҕолору утумнаахтык олимпиадаларга бэлэмниир, кэлин алта сылга улууска да өрөспүүбүлүкэҕэ да инники күөҥҥэ сылдьаллар.
Ону таһынан сыл аайы араас Арассыыйа таһымнаах конференцияларга, конкурстарга оҕолоро ситиһиилээхтик кытталлар. Ол курдук, Бястинова Нарияна, Аржакова Вика уонна учуутал бэйэтэ үрүҥ көмүс мэтээллэри ылбыттара.
Саха сирин үөрэҕириитин Министерствотын Хайҕал грамотатын, Таатта улууһун дьаһалтатын Грамотатын уонна бу ааспыт сыл түмүгүнэн быйыл биһиги төрөөбүт нэһилиэкпит «Сыл бастыҥ үлэһитэ” бочуоттаах аатын ылары ситиспитэ.
Анистя Владимировна оҕолорго баҕа санаата:
Мин идэбин сөпкө талбыппын. Ол иһин эһиэхэ, оҕолорго, баҕарыам этэ эрдэттэн араас куруһуоктарга сылдьыҥ, бэйэҕитин араас көрүҥҥэ боруобаланыҥ, оҕо барыта талааннаах. Баҕа санааҕытын толорорго дьулуһуҥ. Баҕа санаа туоларын ситиһэргэ сыал туруорунуҥ, айыҥ-тутуҥ. Төрөөбүт дойдугутун таптааҥ.
Биһиги убаастабыллаах учууталбытынан киэн туттабыт уонна өссө үрдүк ситиһиилэри баҕарабыт!
Кэпсэттилэр Апросимова София, Парфенова Алина, VIII «Б» кылаас, А.Е. Мординов аатынан Тааттатааҕы лиссиэй үөрэнээччилэрэ, Ытык Күөл, Таатта.
.