Алтынньы 17 күнүгэр Лөгөй лиссиэй-интэринээтигэр бэлиэ күн буолла. Биһиги ситиһиилэрбитинэн Лөгөй лиссиэй-интэринээтэ диэн үрдүк ааты сүкпүппүт номнуо 2 сыла буолла. Сылын ахсын биһиги «День лицеиста» диэн тэрээһин үрдүк таһымнаахтык ыытылларын күүтэбит. Ол курдук, быйыл 19 үйэ кэмигэр биһиги лиссиэйбит киирэн ылла, үөрэнээччилэр бары 19 үйэ саҕанааҕы көстүүмнэри, былааччыйалары сарсыардаттан кэтэн кэлбиттэрэ кэрэхсэбиллээх этэ.
Тэрээһин алыҥ сүһүөх үөрэнээччилэригэр туспа ыытылынна, манна маҥнайгы кылааска киирбит оҕолор Лугинова Саина, Бурнашева Сандаара, Иванов Артем, Хабаров Сулустаан, Егоров Тима, Бурнашева Ксюша, Сокорутов Филипп, Барашев Саян «лицеист» үрдүк аатын ыланнар лиссиэй значоктарын, удостоверенияларын дириэктэр Михаил Петрович Пухов туттарда. Маны тэҥэ, кырачаан оҕолорбут ырыа-үҥкүү эҕэрдэлэрин анаатылар. Быйылгы тэрээһин саамай уратыта диэн үөрэнээччилэргэ анаан маастар-кылаастар тэрилиннилэр: «Уроки бального танца», «Красота», «Спорт и охота», «Этика», «Живопись». Улахан кылаастарга тэрээһин үөрүүлээх арыллыытын 10 кылаас үөрэнээччилэрэ арыйдылар. Кинилэр 19 үйэ саҕанааҕы таҥас маанытын кэтэн кыһыл көбүөр устун долгуйа хаамтылар, дьон-сэргэ биһирэбилин ыллылар. Тэрээһин биир саамай интэриэһинэй көстүүтүнэн төрөппүт Павел Охлопков саксофон диэн музыкальнай инструмеҥҥа оонньоон иһитиннэрдэ. Быйыл биһиги лиссиэйбитигэр саҥа үөрэнэ кэлбит оҕолорго лицеист бэлиэтин уонна удостоверенияны туттардылар. Быйыл олус сонун саҥа тэрээһин буолан ааспытыттан олус үөрдүбүт.
Янис СЫСОЛЯТИН, Лөгөй лиссиэй-интэринээт «SiTiM LegMedia» юнкора