Биһиги 2 Малдьаҕар нэһилиэгин баһылыгын Александр Степанович Алексеевы кытта көрсөн олох-дьаһах, кыстыкка киирии, үлэ-хамнас туһунан кэпсэттибит.
— Александр Степанович, кыстыкка бэлэмнэнии биһиги нэһилиэкпитигэр хайдах бара турарый?
— Үтүө күнүнэн! Малдьаҕар 2-с нэһилиэгэ кыстыкка бириэмэтигэр киирдэ. Билигин саамай сүрүнэ – котельнайдарбыт оттулан тураллар. Котельнайдар балаҕан ыйын 15 күнүттэн толору үлэлииллэр. Ону таһынан нэһилиэк олохтоохторо сүөһү, от боппуруоһун быһааран, үлэлээн-хамсаан кыстыкка киирэргэ бэлэм олороллор.
— Быйыл от үүнүүтэ хайдаҕый, олохтоохтор кыстыыр отторун ыллылар дуо? Быйыл ардахтаах дьылынан сибээстээн ууга барбыт сирдэээх дьоннор отторун-мастарын бэлэмэ хайдаҕый?
— От былаана 86% буолла, барыта 5784 туоннаны оттоотубут. Сенаж быйыл 1243 туоннаны ыллыбыт, сиилэс 2429 туонна. Растениеводство өттүнэн республикатааҕы «Кормопроизводство» программанан сылын аайы биһиги нэһилиэкпит хаһаайыстыбалара: “Берте” сылгы иитэр собуота уонна «Павлов Михаил Васильевич» бааһынай хаһаайыстыба граҥҥа тиксэннэр күрүө тутуннулар, техникаларын саҥардан, сиилэс дьааматын оҥоһуннулар, бааһыналарын сөргүттүлэр. Бу программаҕа киирсэллэригэр сылын аайы нэһилиэк бюджетыттан 500 тыһыынча солкуобай көрүллэр. Улахан хаһаайыстыбаларга саҥа механизированнай хотоннору тутуу үлэтэ ыытылынна.
— Билиҥҥи туругунан, нэһилиэнньэбит ахсаана төһөнүй?
— Нэһилиэнньэ уопсай ахсаана – статистика көрдөрүүтүнэн 1360 киһи, онтон 1200 киһи олохтоохтук олоробут. Онтон дьахтара — 593, эр киһитэ – 639 киһи. Саҥа төрөөбүт оҕоттон 18 дылы саастаах – 362 оҕо баар. 63 оҕобут устудьуоннар.
— Биһиги нэһилиэккэ ыччат төһө олохсуйарый? Саҥа дьиэлэр тутууларын туһунан кэпсиэххит дуо?
— 2024 сылга «Берте» сылгы собуотун үлэһиттэрэ олорор уопсай дьиэлэрэ киирбитэ. Уопсайа — 4 саҥа кыбартыыра. Онон чуолаан тыа хаһаайыстыбатын специалистара олорор дьиэлэрэ элбээтэ. Маны тэҥэ Саха республикатын үлэҕэ уонна социальнай сайдыыга министиэристибэтиттэн 25 ыалбытыгар дьиэлэригэр газ тартарыытыгар ороскуоттаабыт үптэрин субсидия быһыытынан төнүннэриигэ үлэлэстибит. 2 Малдьаҕар нэһилиэгэр саҥа дьиэлэр тутуллаллар, дьон олохсуйуута элбээн иһэр.
— Александр Степанович, кэпсээниҥ иһин махтанабыт!
Богдан Слепцов, М.Е.Васильева аатынан 2 Малдьаҕар орто оскуолатын 8 кылааһын үөрэнээччитэ, “УОТ” медиакиин