Мин Айсаан диэн бырааттаахпын. Кини мин бииргэ төрөөбүт улахан быраатым буолар. Айсаан билигин алта сааһыгар барда. Чычымах «Туйаара» уhуйаан иитиллээччитэ. Быраатым биир дьикти дьарыктаах. Сөбүлээн, уһуннук олорон оонньуур оонньуута — пластилинынан араас ойуулук уонна оонньуу дьоруойдарын оҥорор.
Кини араас быһыылаах-таһаалаах дьоруойдары үс сааһыттан оҥорор буолбута. Аны саамай дьиктитэ — оҥоһуктара бары олус бытархайдар, кыра кээмэйдээхтэр. Ол курдук, бары үс сантиметр эрэ үрдүктээхтэр. Айсаан соҕотоҕун чуумпуга олорон оҥорорун сөбүлүүр. Наһаа кыра оҥоһуктары оҥорор буолан, биир чаас сороҕор икки да чаас олоруон сөп.
Оҥоһуктара бары бэйэ бэйэлэригэр майгыннаспаттар, тус-туһунан быһыылаахтар, араас өҥнөөхтөр. Оҥорбут дьоруойдара үксэ анал ааттаахтар, маны оҕолор үксүлэрэ билэллэр. Ийэлээх аҕам саҥа пластилин анаан Айсааҥҥа ыллахтарына, быраатым олус үөрэр. Кини оҥорбут оҥоһуктарын төрөппүттэрим анаан туспа уураллар, мунньаллар. Биһиги ону бары көрөбүт, астынабыт.
Кириллина Мила, IV кылаас, С.Р. Кулачиков-Эллэй аатынан Чычымах орто оскуолата, Таатта