Николай Семенович Охлопков Сахатын сирин, төрөөбүт норуотун олоҕо-дьаһаҕа, култуурата сайдарын туһугар олоҕун бүтүннүүтүн анаабыт, бар дьон үтүө өйдөбүлүгэр умнуллубаттык хаалар курдук айымньылаахтык үлэлээн ааспыт киһи.
Нам улуустааҕы гимназията Н.С. Охлопков аатын сүгэр. Гимназия коллективын көрдөһүүтүнэн, улуус общественноһын өйөбүлүнэн Саха Өрөспүүбүлүкэтин Бырабыыталыстыбатын1999 с. муус устар 22 күнүгэр уурааҕынан гимназияҕа кини аата иҥэриллибитэ.
1994 с. муус устар 7 күнүгэр Саха Өрөспүүбүлүкэтин үөрэҕириитин миниистрин бирикээһинэн улуустааҕы гимназия аһыллыбыта. Саха Өрөспүүбүлүкэтин бастакы Президенэ М.Е. Николаев 1997 с. кулун тутар 3 күнүнээҕи Ыйааҕынан гимназия Президент оскуолаларын ситимигэр киллэриллибитэ.
***
Биһиги гимназиябыт саҥа үөрэх дьылын хайдах көрсөрүй, туох уларыйыылар, саҥа хамсааһыннар киирдилэр? Бу туһунан гимназия дириэктэрин үөрэх чааһыгар солбуйааччы Софья Петровна Уваровскаяны кытта сэһэргэстим.
https://max.ru/join/mwQKTzgOgUx0GKAQGHHcKysb432FtcAWEYH5AUZQ79U
– Софья Петровна, үтүө күнүнэн! Саҥа үөрэх дьылыгар биһиги гимназиябытыгар хас оҕо үөрэнэрий, быйыл хас оҕо гимназияны бүтэрдэ. Кинилэр үөрэххэ киириилэрэ хайдаҕый?
– Биһиги гимназиябытыгар бу үөрэх дьылыгар 312 оҕо үөрэнэр. Быйыл үөрэх икки хайысханан гимназиябытын 30 оҕо үөрэнэн бүтэрдэ. Кинилэртэн 24 оҕо бука бары үрдүк үөрэххэ киирдилэр. Алта оҕо орто анал үөрэххэ талбыт, сөбүлүүр идэлэригэр үөрэнэ сылдьаллар.
– Ханнык предметтэргэ саҥа учууталлар кэллилэр?
– Быйыл үөрэхтэрин саҥа бүтэрбит үс саҥа учуутал үлэлии кэллэ – нуучча, саха тылын учууталлара, ону таһынан эбии үөрэхтээһин педагога
– Саҥа үөрэх дьылыгар гимназистары туох саҥа сонун сүүрээн күүтэрий?
– Быйылгы үөрэх дьылын Нам улуустааҕы гимназиятыгар технологическай үөрэхтээһин сылынан биллэрдибит. Маннык сылы биллэрии биһиги үтүө үгэспит буолар. Ханнык хайысхаҕа күүстээхтик үлэлиирбитин көрөн, ол сылы биллэрэбит. Быйылгы үөрэх дьылыгар биһиги гимназистарбытын технологическай үөрэхтээһин хайысхатынан техническэй предметтэргэ эбии дьаныардаах дьарык, тэрээһиннэр, олус үчүгэй бырайыактар күүтэллэр.
– Хоруйгут иһин махтанабын. Быйылгы үөрэх дьыла барыбытыгар ситиһиини аҕаллын!
***
Ити курдук Нам улуустааҕы гимназията саҥа ситиһиилэргэ, саҥа арыйыыларга толору бэлэм. Барыгытыгар ситиһиилэри!
Мичийэ ШЕЛКОВНИКОВА, VIII «Б» кылаас,
Н.С. Охлопков аатынан Нам улуустааҕы гимназията