Лөгөй лиссиэй-интэринээтэ Саха сирин судаарыстыбаннаһын күнүн көрсө, «Мин Сахам сирин!» кэнсиэринэн үөрэ-көтө уруйдаатыбыт. Бүгүн оҕолор бэйэ-бэйэлэригэр өрө көтөҕүүлээх үтүө бырааһынньыгы анаатылар. Хас биирдии кылаас кыһаллан оҥостон киэҥ саалаҕа музыкальнай эҕэрдэ анаатылар.
Ол курдук, дириэктэри иитэр үлэҕэ сэбиэтнигэ биһиги бөһүөлэкпитигэр Сахабыт сирин Президенэ кэлэ сылдьыбыттарын туһунан сырдатта. Бастакы Президент Михаил Ефимович Николаев 1992 сыллаахха кэлэн бөһүөлэкпит үлэтин хамнаһын көрөн-истэн сөҕөн барбыт эбит. Ол курдук иккис Президент Вячеслав Анатольевич Штыров туһунан ахтан ааспыта. Үһүс Президент Егор Афанасьевич Борисов Кэптэнигэ кэлэ сылдьан саҥа 220 миэстэлээх таас оскуола туттулларыгар сүрүн өйөбүл буолбут киһи буолар, онон биһиги үөрэнээччилэр, учууталлар махталбыт улахан. Саха сирин Ил Дархана Айсен Сергеевич Николаев 2018 сыллаахха кэлэн саҥа таас Лөгөй орто оскуолатын уораҕайын көрөн ааспыт.
Маны тэҥэ, 5-11 кылаас үөрэнээччилэриттэн 60 оҕо, Саха сирин автономията тэриллиититтэн саҕалаан историятыттан, онлайн викторинаҕа кытынна. 4 кылаас үөрэнээччилэрэ «Моя любимая Якутия» акцияҕа кыттыстылар. 100% бары бырааһынньык тэрээһинигэр кытынныбыт.
Янис СЫСОЛЯТИН, SiTiM LegMedia юнкора