В.П. Ларионов аатынан Майа орто оскуолатын үөрэнээччилэрэ, «Мэҥэбил» медиа киин юнкордара, Тимофей Сметанин «Мэхээлэчээн булчут кэпсээннэрэ» айымньытынан ойууламмыт комиксы астынан аахтыбыт. Бу айымньынан киинэ тахсаары турар буолан, ааҕарга өссө интэриэһинэй этэ. Аны киинэтэ таҕыстаҕына, айымньыны кытары тэҥнээн көрүөхпүт.
Оттон биһиги аахпыт комикспыт “Кэскил” оҕо бэчээтин кыһата ыйга биирдэ таһаарар «Бэлэм буол» сурунаалыгар бу дьыл тохсунньутуттан хас ый аайы бэчээттэннэ. Биһиги оскуола “Бэлэм буолга” сурутуубутунан туппут сурунаалларын медиа кииммитигэр сылдьар 8 оҕо бары бу нэдиэлэ устата, атастаһа сылдьан, Мэхээлэчээн булчут хас да кэпсээнин сөбүлээн аахтыбыт.
Федя Степанов: “Миэхэ Мэхээлэчээн сырыыларыттан саамай өйдөнөн хаалбыта — Мэхээлэчээн быраатын уонна балтытын кытта балаҕаҥҥа күүлэйдии баран иһэн бөрөнү кытта көрсүүлэрэ”.
Лилиана Слепцова: «Мэхээлэчээн кэпсээннэриттэн мин саамай сөбүлээбит түгэним – Мэхээлэчээн кутаҕа батыллыбыт күнэ. Онно саамай күлүүлээҕэ диэн батыллан сыттаҕына, кини төбөтүгэр кус кэлэн сымыыттабыта буолар, оттон саамай соһуйбутум диэн – Мэхээлэчээн кутаттан бөрө кутуругуттан тутуһан тахсыбыта».
Комиксы ааҕан, Мэхээлэчээн сырыыларын сөхтүбүт, соһуйдубут уонна бу айымньыны хайдах киинэ гынан устан таһааралларын көрүөхпүтүн олус баҕардыбыт. Киинэ тахсарын долгуйа күүтэбит!
Сиһилии видео-матырыйаалбытыгар көрүҥ:
«Мэҥэбил» медиа киин эдэр кэрэспэдьиэннэрэ, Майа, Мэҥэ Хаҥалас