Сыл аайы балаҕан ыйын 27 күнүгэр долгуйан туран, Саха Өрөспүүбүлүкэтин судаарыстыбаннаһын күнүн бэлиэтиибит. Саха сирин государственнай тутулун иилээн-саҕалаан тэрийбит, төрүттээбит дьонунан биллиилээх государственнай уонна политическай деятеллэр Исидор Барахов, Максим Аммосов, Былатыан Ойуунускай, Степан Аржаков буолаллар. Сааһыгар тэҥэ суох муударай уонна кэскиллээх эдэр көлүөнэ дьон сыралаах, сындааһыннаах туруулаһар үлэлэринэн, тулхадыйбат туруорсууларынан Саха сирин олоҕо тосту уларыйбыта, Сахабыт сирэ сайдыы суолугар үктэммитэ.
Ол курдук, балаҕан ыйын 26 күнүгэр биһиэхэ, Үөһээ Бүлүү Харбалааҕар, Автономияны турууласпыт саха чулуу уолаттарыттан биирдэстэрэ, дириҥник ытыктыыр уонна сүгүрүйэр биир дойдулаахпытыгар Исидор Никифорович Бараахап мэҥэ тааһыгар сүгүрүйэ үөрүүлээх миитиҥҥэ муһуннубут. Исиидэр Бараахап мэҥэ тааһыгар сүгүрүйүүбүт бэлиэтин сибэкки дьөрбөтүн уурдубут. «Уолан» хоһоонньут уолаттар бөлөҕө хоһооннорун аахтылар.
Үөрүүлээх тэрээһиҥҥэ үүнэн тахсан иһэр көлүөнэ ыччакка, нэһилиэк, улуус дьонугар-сэргэтигэр Саха Өрөспүүбүлүкэтин Бырабыыталыстыбатын дьаһалтатын салайааччы Георгий Николаевич Михайлов эҕэрдэ тылын анаата. Кини республика суверенитетын тутан хааларыгар Саха Өрөспүүбүлүкэтин Бастакы Бэрэсидьиэнэ М.Е.Николаев уһулуччу оруолун бэлиэтээн туран, бу уустук кэмҥэ бары сомоҕолоһон, салайааччыларбыт тула түмсэн кыайыыны бииргэ уһансарга ыҥырда.
Тэрээһин биир ураты, долгутуулаах түгэнинэн наҕараадалааһын буолла. Ол курдук, РФ Президенин бу дьыл муус устар 25 күнүнээҕи уурааҕынан анал байыаннай дьайыы кэмигэр көрдөрбүт хорсун санааларын, Ийэ дойдуга бэриниилэрин иһин «Эр санааланыы» уордьанынан (өлбүтүн кэннэ) биһиги биир дойдулаахпытыгар, сырдык тыынын толук уурбут Валентин Прокопьевич Ноговицын наҕараадаланна. Тапталлаах уолун наҕараадатын Валентин күн-күбэй ийэтэ Тамара Васильевна Ноговицына харах уулаах тутта. Хорсун быһыыны көрдөрбүт, биһиги оскуолабыт выпускнига Валентин Ноговицын аатын киэн тутта ааттыахпыт, сырдык мөссүөнэ сүрэхпитигэр тыыннаах буолуоҕа.
Улууспут баһылыга Валерий Николаев Бочуотунай грамотаны улуус социальнай-экономическай сайдыытыгар киллэрбит кылааттарын иһин оскуолабытыгар өр сылларга үлэлээбит ытыктыыр учууталларбытыгар СӨ үтүөлээх учуутала, педагогическай үлэ бэтэрээнэ, Харбалаах нэһилиэгин бочуоттаах олохтооҕо, сэрии кэмин оҕото Людмила Акимовна Бараховаҕа уонна РСФСР үөрэҕириитин туйгуна, педагогическай үлэ бэтэрээнэ, Харбалаах нэһилиэгин бочуоттаах олохтооҕо, сэрии кэмин оҕото Розалия Евсеевна Филипповаҕа туттарда.
Маны таһынан, Российскай Федерация гражданина буолбуттарын туоһулуур докумуону-паспордары туттарыы үөрүүлээх түгэнэ ыытылынна. Бу бэлиэ күн паспордарын Николай Якутскай аатынан Харбалаах орто оскуолатын ахсыс кылааһын үөрэнээччилэрэ Мила Николаева, Александра Филиппова, Айыллаана Петрова туттулар.
Барыгытын Судаарыстыбаннас күнүнэн ис сүрэхтэн эҕэрдэлиибит. Кэлэр кэми кэрэһилиир, биир санаанан билиигэ-сайдыыга дьулуһуубут өрүү күүстээх буоллун!
Сиһилии видео-матырыйаалга көрүҥ:
«Куорсуннаах сурук» медиа киин эдэр кэрэспэдьиэннэрэ,
Харбалаах, Үөһээ Бүлүү.