Балаҕан ыйын 27 күнэ — Саха Өрөспүүбүлүкэтин судаарыстыбыннаһын күнэ. Бу күн Саха сирин хас биирдии олохтооҕор суолталаах күн.
Афанасий Петрович Илларионов аатын сүгэр Хайахсыт орто оскуолатын үөрэнээччилэрэ үөрүүлээх күммүтүгэр бэлэмнэнэн саҕалаатыбыт. Ол курдук “Оҕо саас сирдьиттэрэ” Өрөспүүбүлүкэтээҕи тирэх киин көҕүлээһининэн ыытыллар «Любимая моя, Якутия!» акцияҕа кыттыыны ыллыбыт.
Биһиги, активистар, хас биирдии үөрэнээччи кыттыыны ылалларын курдук, барыларыгар сүрэх ойуутун кырыйан аҕалалларыгар сорудахтаабыппыт. Оҕолор бары бэйэлэрин илиилэринэн тутан-хабан, ис дууһаларын ууран оҥорбут сүрэхтэрин аҕалбыттара. Хас биирдии сүрэх бэйэтэ истиҥ санаалаах, араас кээмэйдээх, дьүһүннээх буолбут. Ону барытын түмэн, Саха сирин былааҕын уратытык оҥорон таһаардыбыт.
Бу төрөөбүт дойдубутугар, Өрөспүүбүлүкэбитигэр тапталбыт бэлиэтэ.
Комила АРЖАКОВА, XI кылаас, А.П. Илларионов аатынан Хайахсыт орто оскуолата, Чурапчы