Балаҕан ыйын биир сүрүн ыйытыытыгар хоруй ылаары, биһиги Аммабыт улууһун депутаттарын сэбиэтин бэрэссэдээтэлигэр Владимир Владимирович Колосовка ыйытыыларбытын биэрдибит. Амма улууһун дьаһалтатыгар декада буола турарын, нэдиэлэ устата «День приема граждан» ыытылларын туһунан сырдатта. Манна хас биирдии улуус нэһилиэктэрин исписэлиистэриттэн саҕалаан улуус баһылыгар, улуус депутаттарын сэбиэттэрин бэрэсэдээтэлигэр диэри улуус, нэһилиэк олохтоохторо төһө баҕарар кэлэн бэйэлэрин ыйытыыларын биэриэхтэрин сөп. Маннык тэрээһиннэр күн аайы буолалларын, нэдиэлэ аан күнүгэр улуус баһылыга бэйэтэ «Прием граждан» диэн хайаан даҕаны оҥорорун бигэргэттэ. Депутаттар сэбиэттэрин бэрэссэдээтэлигэр Владимир Владимировичка аан куруук аһаҕаһын биллэрдэ. Хас биирдии олохтоох кэллэҕинэ үөрэ-көтө көрсөллөрүн, кыһалҕалаахтарга күүс-көмө буолалларын, сүбэ-ама биэрэллэрин кэпсээтэ.
«Ханнык долгутуулаах ыйытыылары дьон быдан элбэхтэ ыйыта кэлэрий?» диэн боппуруоспутугар бу курдук хоруйдаата: «Биһиэхэ кэлэр дьон ыйытыылара араас буолар. Билигин кыстыкка киирии кэмэ буолан үксүн ититиини ыйыта кэлэллэр. Ону таһынан биир долгутуулаах ыйытыы анал байыаннай дьайыыларга сылдьар ыччаттаах дьон кэлэн көмө көрдүүллэр, ким эрэ улаханнык ыалдьыбыт дьон көмөҕө наадыйан кэлэллэр, нэһилиэк, түөлбэ араас боппуруостарыгар көмө көрдөөн киирэллэр, ыттары кытта охсуһууну быһаараары кытта кэлэллэр, уулусса сырдатыытын хааччыйыыга ыйытыылар эмиэ бааллар. Биһиги дойдубутугар кинигэ таһааттарыыта элбэх, онно көмө көрдүүллэр. Уопсайынан эттэххэ, олох туох баар хайысхатыттан барытыттан кэлэллэр«.
Бу ыйытыылары, кыһалҕалары быһаарар сыалтан улуус дьаһалтата биир дойдулаахтарыгар туох баарынан күүс-көмө буолар. Өскөтүн кинилэр өттүлэриттэн кыайтарбат буоллаҕына, үрдүкү салалтаҕа Саха Өрөспүүбүлүкэтин Бырабыыталыстыбатыгар, Ил Түмэҥҥэ тиийэ көмө көрдөөн тахсалларын эттэ. Кыһалҕалары кыайар баҕаттан араас ньымалары булан быһаараллара биир дойдулаахтарыгар ис сүрэхтэриттэн олус кыһаллалларын бигэргэтэр.
Кэпсэтиибит түмүгэр Владимир Владимирович биһиэхэ баҕа санаатын, махталын, олус эрэнэрин эттэ. Маны истэн биһиги өссө кынаттанан, улууспутун чахчы сайыннарар дьон буола улаатыахпыт диэн эрэлбит өссө күүһүрдэ. «Ойуурдаах куобах охтубат, дьонноох киһи тутайбат» диэн өс хоһоонунан кылгас сырдатыыбытын түмүктүүбүт.
Айыына ДАВЫДОВА, Х кылаас, Аайа КИРИЛЛИНА, IX кылаас,
Л.В. Киренскэй аатынан Амматааҕы лиссиэй