Бүгүн, балаҕан ыйын 26 күнүгэр, А.Е.Мординов аатынан Тааттатааҕы лиссиэй аактабай саалатыгар поэт, публицист, кыраайы үөрэтээччи, Арассыыйа суруйааччыларын Сойууһун бырабылыанньатын сэкирэтээрэ, «Чолбон» сурунаал бас эрэдээктэрэ, биир дойдулаахпыт Гаврил Андросов-ХАБЫРЫЫС ОНДОРООС «ЧИҤ САХА БИҺИГЭ КҮН ТААТТАМ» диэн хоһоон уонна ырыа, айымньы уонна сэһэн түһүлгэтэ үгүс дьону муста.
Ураты тыыннаах, айар тыл алыптаах тэрээһинин улуустааҕы киин библиотека үлэһитэ Светлана Семеновна Игнатьева иилээн-саҕалаан ыытта. Бастаан поэт бэйэтин хоһоонноруттан доргуччу ааҕан, тэрээһин кыттыылаахтарын истиҥ эйгэҕэ киллэрдэ.
Салгыы учууталлар, тыл, култуура эйгэтин үлэһиттэрэ, үөрэнээччилэр Гаврил Андросов айар үлэтин ырытыыга көхтөөхтүк кытыннылар, айымньыларыттан талан дириҥ ырытыылары оҥордулар. Ырытыылар тыл, Айыылар, история, сирдэр ааттара, ахсаан өттүттэн ырыттылар, ыйыттылар, сиһилии хоһоону арыйдылар.
Кыттыбыт дьон бары маннык тэрээһин хайаан да наадалааҕын ыйдылар, оҕолор сэҥээрбиттэрин биллэрдилэр.
А.Е. Мординов аатынан Тааттатааҕы лиссиэй медиа киин оҕолоро,
Ытык Күөл, Таатта