Балаҕан ыйын 24-28 күннэригэр Дьокуускай куоракка «Ас-үөл-2025» атыы-эргиэн дьаарбаҥката ыытылла турар. Бүтүн Саха сирин тыа хаһаайыстыбатын оҥорон таһаарааччылары түмэр улахан тэрээһиҥҥэ агрооскуолалар эмиэ көхтөөхтүк кытталлар. Быйыл барыта 14 оскуола кыттыыны ыла сылдьар.
Мэҥэ-Хаҥалас улууһун Д.С. Федоров-Дмитрий Таас аатынан Хорообут орто оскуолата бэйэ оҥорон таһаарбыт бородууксуйатын дьаарбаҥкаҕа атыыга аҕалла. Биир сонун бырайыагы 11 кылаас үөрэнээччитэ Алина Шестакова 2023 сылтан үлэлэһэн олоххо киллэрбит. Билигин «Отуу миинэ» диэн хатарыллыбыт оҕуруот аһыттан миини нэһилиэккэ эрэ буолбакка, улууска эмиэ билэллэр.
Д.С. Федоров-Дмитрий Таас аатынан Хорообут орто оскуолатын дириэктэри иитэр үлэҕэ солбуйааччы Октябрина Егоровна Васильева кэпсиир:
— «Продукции Хоробутской агрошколы методом сушки» бырайыагынан Алина Шестакова былырыын 10 кылааска үөрэнэ сылдьан бүтүн Арассыыйатааҕы конференцияҕа кыттан турар. Салайааччыларынан физика учуутала Анна Петровна Шестакова уонна оскуола агронома Мария Александровна Бугаева буолаллар. Бу бырайыагынан грант кыайан, дегитратор ыланнар, үлэлэрэ өссө кэҥээтэ. «Отуу миинин» оҥорооһунугар оскуолабыт үөрэнээччилэрэ оҕуруот аһын көрүүтүгэр, хомуйуутугар, хатарааһыныгар, бары үлэтигэр барытыгар көмөлөһөллөр. Маны таһынан моонньоҕонтон, араас отонтон пастила, оскуола питомнигын маһыттан, үүнээйититтэн чэй, хатарыллыбыт собо миинэ оҥоробут.
Агро хайысхалаах Хорообут орто оскуолата анал байыаннай дьайыыга сылдьар биир дойдулаахтарыгар бэйэ бородууксуйатынан эмиэ күүс-көмө буолаллар. 1995 с. оскуола выпускнига Д.Р. Иванов кылгас кэмҥэ уоппускаҕа кэлэ сырыттаҕына, «Отуу миинин» байыастарга биэрэн ыыппыттара.
Сиһилии видеоҕа көрүҥ:
keskil14.ru