М.Е.Васильева аатынан 2 Малдьаҕар орто оскуолатын алын сүһүөх кылааһын учуутала Трофимова Валентина Михайловна «Сүһүөхтээн ааҕыы» кинигэтин сүрэхтэниитэ буолла. «Айар» кинигэ кыһатын үлэһиттэрэ, ыҥырыылаах ыалдьыттар, Хаҥалас улууһун алын сүһүөх кылаастарын учууталлара, Валентина Михайловна выпускниктара уонна үөрэнээччилэрэ, төрөппүттэр кыттыыны ыллылар.
Ааптар санаатын маннык үллэстэр: «Бу кинигэҕэ бэриллибит табылыыссалар, тиэкистэр оҕо саҥа ааҕа үөрэнэр кэмигэр туһалаах буолуохтара. Тыллар М.Ф.Кронникова «Букубаарынан» буукубаны үөрэтии бэрээдэгэр олоҕуран таҥыннылар. Оҕо сүһүөхтэрин көрдөөн буларын оонньуу курдук ылынар, онон ааҕарга интэриэстээх буолар. Оҕо сүһүөхтэри көрдүүр кэмигэр хараҕын дала кэҥиир, өйдөөн хаалар сатабыла сайдар. Тылы таба суруйарга үөрэнэр. Ойуулар көмөлөөхтөр. Ситиһиилээх дьарыктары баҕарабын!»
Валентина Михайловна быйыл учууталлаабыта 30 сыл буолла. Онон бу кинигэ тахсыыта эмиэ биир бэлиэ түгэнинэн буолар. Саҥа тахсыбыт кинигэ дьон болҕомтотун тардан, түргэнник атыыга тарҕанна. Валентина Михайловна саамай улахан махталын «Айар» кинигэ кыһатыгар тиэрдэр.
Бу күн улуус алын сүһүөх кылаастарын учууталларыгар уонна олохтоохторго анаан кинигэ кыһатын специалистара олус туһалаах сүбэлэри биэрдилэр, хайдах кинигэ бэчээттэтэргэ, туохха болҕомто уурарга, ханнык саҥа кинигэлэр тахсыбыттарын билиһиннэрдилэр. Оҕолор, учууталлар идиэйэлэрин иһиттилэр.
2 Малдьаҕар орто оскуолатын үөрэнээччилэрэ Осипова Ильяна, 8 кыл., Габышева Дамира, 4 кыл., Артамонов Ганя, 5 кыл. саҥа сахалыы оонньуулары айбыттарын кэпсээтилэр. Инникитин бу оонньуулар бэчээттэнэн, Саха сиригэр тарҕаналларыгар баҕарабыт. Оттон Валентина Михайловнаны өссө төгүл сахалыы тыыннаах кинигэни бэчээттэппитинэн эҕэрдэлиибит, төрөппүттэр, учууталлар, иитээччилэр «Айар» кинигэ кыһатыттан атыылаһаргытыгар ыҥырабыт.
Надежда Громова, эбии үөрэхтээһин педагога Сандаара Максимова хаартыскаҕа түһэриилэрэ, 7 кылаас үөрэнээччитэ, медиакиин