Балаҕан ыйын 15 күнүгэр «Энергетик» лааҕырга Бүтүн Арассыыйатааҕы «Путь Воина» байыаннай-тактическай күрэх түмүктүүр түһүмэҕин чэрчитинэн Россия Геройдарын кытта көрсүһүү буолла.
Тэрээһиҥҥэ Тюменьтан, Волгоградтан, Хабаровскайтан, Саха сириттэн уопсайа 40 курсант кыттыыны ылла. Көрсүһүүнү Саха Өрөспүүбүлүкэтин Ыччат дьыалатыгар уонна социальнай коммуникацияларга министиэристибэтин миниистирэ, анал байыаннай дьайыы кыттыылааҕа Петр Шамаев иилээн-саҕалаан ыытта. Сүрүн ыалдьыттарынан Саха сириттэн анал байыаннай дьайыы кэмигэр бастакынан «Россия Героя» ааты ылбыт «Боотур-1» баҕа өттүнэн дойдуларын көмүскүү барбыт дьон этэрээттэрин хамандыыра, «Сулус» үөрэтэр-стрелкаовай киин салайааччыта Александр Гаврильевич Колесов уонна , Россия Героя 252-с мотострелковай полк мотострелковай батальонун хамандыыра, подполковник Николай Соболев буоллулар. Геройдар иккиэн «Время героев» бырагыраама кыттыылаахтара.
Кэпсэтии, буоларын курдук, бэйэни билиһиннэрииттэн саҕаланна. Александр Колесов оҕо сааһын туһунан, дойдутун көмүскүү барбыт бастакы түгэниттэн кэпсээтэ. Кини кыра эрдэҕиттэн оскуолаҕа стендэтигэр турар Аҕа Дойду Улуу сэриитин геройдарын, онтон кэлин Афган сэриитин геройдарын мэтириэттэрин сэҥээрэн көрөр эбит. Кинилэр туһунан суруйуулары чааһы чааһынан ааҕыан сөп эбит уонна хайдах кинилэр бэйэлэрин кыанан хорсун быһыыны оҥорбуттара буолуой диэн саныыр эбит. Кэлин армияҕа сылдьан миротворецтаан, онтон Чечня бастакы хампаанньатыгар кыттыыны ылбыт эбит. Анал байыаннай дьайыы саҕаламмытын дойдубут президенэ Владимир Путин норуокка туһаайыллыбыт этиитин истэн, туора турбакка дойдутун көмүскэлигэр турунарга быһаарыммыт. «Боотур-1» этэрээти тэрийэн, этэрээккэ 100-кэ баҕалаах дьону талан Саха сириттэн биир бастакынан фроҥҥа айаннаабыттар. Бу мантан кини анал байыаннай дьайыыга кылаата саҕаламмыт. Герой аатын сатабыллаах салайааччы, сөптөөх быһаарыныыны ылынан ахсаанынан лаппа баһыйар өстөөхтөртөн чаҕыйбакка уот, буулдьа ардаҕын анныттан 50-ча бааһырбыт буойуттары быыһаабытын иһин ылбыт.
Николай Соболев – инникиттэн байыаннай идэтин талбытын туһунан сырдатта. Байыаннай тылбаасчыт үөрэҕин бүтэрэн баран Аан Дойду араас муннуктарыгар буолбут байыаннай дьайыыларга сылдьыбытын туһунан билиһиннэрдэ. Сатабыллаах салайааччы быһыытынан байыаннай суолталаах үрдэллэри ылан, ол үрдэллэри ахсаанынан элбэх өстөөхтөртөн нэдиэлэ устата көмүскээбитин иһин «Россия Героя» аатын ылбыт.
«Путь Воина» күрэх кыттааччылара Геройдарга бэйэлэрэ интэриэһиргиир ыйытыыларын биэрэн истиҥ кэпсэтии таҕыста. Ыйытыылара ханнык байыаннай үөрэхтэр баалларыттан саҕалаан окопаҕа саҥа дьылы хайдах көрсөллөрүн туһунан тиийэ буоллулар. Геройдар ыйытыыларга үгүһү кистээбэккэ, хайдах баарынан кэпсээтилэр. Төрөппүттэргэ болҕомто, доҕордуу сыһыан, дойдуга бэриниилээх буолуу тула сэһэргэһии таҕыста.
Александр Колесов: «Спордунан дьарыктаныҥ. Хайдахтаах да түгэҥҥэ түбэспитим иһин, дьарыктаах буоларым элбэхтэ быыһаабыта. Спорт эти-хааны эрэ сайыннарбакка, тулууру уонна ис туругу бөҕөргөтөр. Эһигинэн киэн туттабын. Биһиги кэммит аастаҕына, эһиги кэмҥит кэлиэҕэ».
Николай Соболев: «Ханнык баҕарар түгэҥҥэ эрэли сүтэримиэххэ наада. Үтүө майгы уонна чиэһинэй буолуу киһи сүрүн хаачыстыбалара».
Көрсүһүү бэрт истиҥ ис хоһоонноох ааста. Кыттааччыларга ситиһиини баҕарабыт.
keskil14.ru