Саҥа үөрэх дьылынан, саҥа сайдыы суолунан!
Алтан чуораанынан чугдааран, саҥа үөрэх дьылын В.П. Ларионов аатынан Майа орто оскуолата балаҕан ыйын 1 күнүгэр билии киэҥ аартыгар сирдиир аанын тэлэччи арыйда.
Билии күнүн көрсөр үөрүүлээх линейкэбитигэр Мэҥэ Хаҥалас улууһун аҕа баһылыга Дмитрий Иванович Тихонов, «Майа сэлиэнньэтэ» тыа сирин дьаһалтатын баһылыга Алексей Иннокентьевич Неустроев, Мэнэ Ханалас улууһун үөрэҕириитин иитэр үлэҕэ уонна эбии үөрэхтээһин отделын салайааччыта Ньургуяна Аркадьевна Варламова кэлэн ыалдьыттаан, оҕолору, үлэһиттэри эҕэрдэлээтилэр.
Быйылгы үөрэх дьылыгар 1 кылааска 86 үөрэнээччи оскуола боруогун атыллаата. Кылаас салайааччыларынан 1 «а» кылааска – Елена Николаевна Ильина, 1 «б» — Наталья Николаевна Афанасьева, 1 «в» — Александра Антоновна Борисова буоллулар. Быйылгы үөрэх дьылыгар оскуолабытыгар 9 кылааска уопсайа — 77 үөрэнээччи, 11 кылааска – 72 үөрэнээччи эппиэтинэстээх экзамен туттарар сылларыгар үктэннилэр.
Саҥа саҕаламмыт үөрэх дьылыгар Арассыыйа судаарыстыбаннай былааҕын өрө көтөҕөр бочуоттаах быраап бэрилиннэ: «Хорсун быһыытын иһин» Юра Ефимовка (8 “в” кылаас), өрөспүүбүлүкэтээҕи аһаҕас “Ходуһа Хоһууннара” диэн илии хотуурунан от охсуутун күрэҕин кыайыылааҕар Эрчимэн Тихоновка (7 “в” кылаас), XXII төгүлүн ыытыллыбыт күрэс төрүт көрүҥнэригэр «Манчаары оонньууларын» атах оонньууларын кыайыылааҕар Максим Семеновка (10 “а” кылаас), өрөспүүбүлүкэтээҕи “АГРОНТРИ-2025” конкурс “Агрометео” хайысха кыайыылааҕар Нарыйа Солдатоваҕа (11 “б” кылаас), “Агрокосмос” хайысха кыайыылаахтарыгар Айаал Поповка (11 “б” кылаас), Тимур Никаноровка (7 “в” кылаас) уонна “Добропчел” хайысха кыайыылааҕар Амина Бурнашеваҕа (11 “б” кылаас), Аан дойдутааҕы “Хрустальный лотос” конкурс-фестиваль 2 степеннээх лауреаттара 8 “в” кылаас ансаамбылыттан Афанасийга Тимофеевка, “Соло” хайысха кыайыылааҕар 6 “б” кылаас үөрэнээччитигэр Айдын Жирковка.
Оскуолабытыгар быйылгы 2025-2026 үөрэх сылыгар саҥа учууталлар кэллилэр. Кинилэри кытта көрсөн кэпсэттибит.
Валентина Петровна Стручкова, физика учуутала:
Мин учуутал идэтинэн үлэлээбитим 19 сыла буолла. Былырыын Аллараа Бэстээххэ М. Е. Попов аатын сүгэр 1 №-дээх оскуолаҕа үлэлээбитим. Быйыл бу В. П. Ларионов аатынан оскуолаҕа үлэбин саҕалаатым. Кэлэр үөрэх сыла саҥа саҕахтары арыйдын, элбэх ситиһиини аҕаллын диэн баҕа санаалаахпын.
Валерия Владиславовна Расторгуева, математика учуутала:
Мин менеджмент кафедратыгар, СВФУ-га финансовай-экономическай институтка үөрэммитим. Бу иннинэ биир сыл Бөкөҕө Догдоҥо орто оскуолатыгар үлэлээбитим. Оскуола үрдүнэн 32 оҕо баара. Ол да буоллар, аҕыйах оҕону үөрэтэргэ бэйэтэ кыһалҕалардаах. Быйыл улахан оскуолаҕа саҥа үлэлээн эрэбин, этэҥҥэ үлэлиир инибит диэн эрэнэбин.
Саҥа үөрэх дьыла саҥа саҕахтары арыйдын, үгүс үөрүүнү-көтүүнү, кыайыыны-хотууну аҕаллын!
Романова Варя, Слепцова Лилиана 10 «б» кылаас үөрэнээччилэрэ
«Мэҥэбил», Мэҥэ-Хаҥалас