Доҕордоһуу болуоссатыгар “Дорообо, тапталлаах 17 оскуолам” үөрүүлээх элэниэйкэни быйыл саҥа анаммыт дириэктэр Чиряев Анатолий Николаевич арыйда.
Хас да сыл сыратын ууран туран тапталлаах оскуолабыт сайдарыгар үлэлэспит “СР Үөрэҕириитин үтүөлээх үлэһитэ”, “РФ бочуоттаах үлэһитэ”, “Учууталлар учууталлара”, Мэтэдиис учуутал” анал аат бэлиэлээх Афонская Лена Петровна саҥа дириэктэргэ Үөрэх-билии күлүүһүн туттарыыта биир бэлиэ түгэнинэн буолла. Ону таһынан ыҥырыллан кэлбит ыалдьыттар линейканы киэргэттилэр: Алена Атласова- СӨ Ил Түмэн мунньаҕын дьокутаата, Сергей Сюльскай – СӨ общественнай палататын комиссиятын салайааччыта уонна Надежда Валиулова – биһиги оскуолабыт төрөппүттэрин мунньаҕын председателэ.
Барыта 140 кырачаан оҕолор оскуолабыт 1 кылааһын боруогун атыллаатылар. Үөрэтэр учууталларын долгуйа, сибэкки тутуурдаах үөрэнээччилэр, төрөппүттэр үөрэ-көтө көрүстүлэр. Быйыл эмиэ үгэс быһыытынан, маҥнайгы кылаас чаастарыгар оскуола выпускниктара кырачааннарга «Инникигэ” диэн ааттаан-суоллаан кумааҕы сөмөлүөттэри туттартаатылар. Инникитин кырачааннарбытыгар А,Б-тан саҕалаан сатаан ааҕар, суоттуур, үөрэххэ тардыһыылаах буолан тахсалларыгар баҕарабыт.
— Анатолий Николаевич, кылгастык бэйэҕит туһунан билиһиннэриэххит дуо?
— Үтүө күнүнэн буолуохтун, күндү эдэр корреспонденнар!
Мин Чиряев Анатолий Николаевич диэммин, бэйэм идэбинэн омук тылын учууталабын. Мин манна кэлиэм иннинэ Дьокуускай куораттааҕы Национальнай гимназияҕа үлэлии сылдьыбытым. Директоры иитиигэ солбуйааччынан, омук тылын учууталынан уонна кылаас салайааччытын быһыытынан үлэлээбитим. Бэйэм учууталлар династияларын утумнааччы салҕааччы буолабын.
— Быйылгы үөрэх дьылыгар хас оҕо үөрэнэрий? 1 кылааска төһө оҕо киирдэ?
— Бүгүҥҥү туругунан оскуолаҕа барыта 1585 оҕо икки сменанан икки куорпуһунан үөрэнэр. Маҥнайгы кылааска 140 оҕо үөрэнэ киирдилэр. “А” уонна “Б” нуучча кылааһыгар 36-лыы оҕо киирдэ, “В” уонна “Г” кылааска саха кылаастарыгар 34-түү оҕо киирдэ.
— Анатолий Николаевич, саҥа үөрэх дьылыгар 3 сүрүн соруккут туох буоларый ?
— Уон сэттис оскуола баай дириҥ устуоруйалаах, биллэр-көстөр учууталлардаах, элбэх кыайыылаах оскуола буолар. Ону ыһыктыбакка салҕыы тутуһуохпут диэн бигэ эрэллээхпин. Бу оскуола рейтининэн көрдөххө, үчүгэй көрдөрүүлээх оскуолаларга киирэр, ол таһыммытын тутан олоруохпут диэн эрэнэбин. Быйылгыттан пристройбутун саҕаланан, тутуу күүскэ барарын ситиһиэм. Санатан эттэххэ, эбии 275 миэстэлээх салҕаммыт куорпус буолуохтаах. Үс этээстээх, 4 тыһ.кв.миэтэрэлээх улахан киэҥ-куоҥ, сырдык оскуола былааннанар. Иккис этээһинэн переход баар буолуохтаах. Киэҥ аактабай саалалаах, эбии үөрэнэр кабинеттардаах, улахан аһыыр сирдээх. Бастакы улахан сыалбыт-сорукпут ол буолар. Уонна оскуоланы бүтүннүү капитальнай ремоннаан тупсарар үлэ буолар иккис соругум буолар. Оскуолаҕа 2002 сылтан туох да улахан өрөмүөн барбакка турар. Уонна саамай сүрүнэ диэн оҕолорбут ситиһиилэригэр болҕомто ууруу буолар. Оскуоланы бүтэрээччилэрбит сөбүлүүр идэлэрин сөпкө талан үөрэххэ киирэллэрин баҕарабын.
— Биһиги оскуолабытыгар туох күүстээх өрүттэри бэлиэтии көрдүгүт?
— Үөрэхпитигэр элбэх ситиһиилэр бааллар эбит диэн бэлиэтээн көрдүм. Бу оскуоланы бүтэрбит оҕолор билиҥҥи кэм ирдэбилинэн, престижнэй үөрэх кыһаларыгар киирбиттэр. Ону таһынан, оҕону патриотическай иитиигэ сүрүн болҕомто ууруллубутун көрөн үөрдүм. Маладьыастар! Учуутал уонна оҕо ситимэ 17 оскуолаҕа күүстээх диэн көрдүм.
— Үөрэнээччилэргэ, төрөппүттэргэ бу саҥа үүммүт үөрэх дьылыгар тугу баҕарыа этигитий?
— Баҕарыам этэ барыларыгар санаа көтөҕүллүүтүн, чөл туругу, чэп-чэгиэн доруобуйаны. Оҕо санаатын ыга туппакка, бэйэтин баҕа санаатынан сирдэнэн, сөптөөх идэтин талан ыларыгар, олоҕун суолун оҥосторугар, оскуолатын туһугар бары биир кэлимсэ, ситим буолан үлэлэһэллэригэр. Оскуолабытыгар элбэх талаан арылла турдун!
«Сайдын» медиа ситим аатыттан эмиэ эдэр дириэктэрбитигэр үгүс ситиһиилэри, дабайыылары, баҕа санаата олоххо киирэ турарын баҕарабыт.
Юлиана ГУРЬЕВА, Ая ИВАНОВА, VII кылаас,
«Сайдын» медиакиин юнкордара, 17№-дээх оскуола, Дьокуускай
keskil14.ru