Чуораан тыаһынан чугдааран
Билии күнэ үүннэ!
Балаҕан ыйын 1 күнүгэр Сэмэн Данилов аатынан Бэрдьигэстээх орто оскуолата сибэкки дьөрбөлөөх үөрэнээччилэри, күндү төрөппүттэри, убаастабыллаах учууталлары уонна ытыктабыллаах ыалдьыттары үөрэ-көтө көрүстэ. Үөрүүлээх быһыыга-майгыга ыҥырыылаах ыалдьыттарынан буоллулар улуус баһылыгын солбуйааччы Алгыс Иннокентьевич Стручков, улуус дьокутааттарын Сэбиэтин бэрэссэдээтэлэ Маргарита Гаврильевна Константинова, Бэрдьигэстээх нэһилиэгин баһылыга Алексей Григорьевич Аргунов уонна улуустааҕы үөрэх салалтатын начальнигын солбуйааччы Аина Егоровна Егорова.
Быйылгы үөрэх дьылыттан оскуолабыт биирдиилээн предметтэри дириҥэтэн үөрэтии хайысхатынан үлэтин саҕалыаҕа диэн үөрүүлээх-быһыыга майгыга оскуолабыт дириэктэрэ Павел Алексеевич Петров барыбытын үөртэ, эмиэ да долгутта.
76 оҕо аан маҥнай оскуола боруогун атыллаан киирдилэр. Кинилэри Лидия Алексеевна Максимова, Марианна Ивановна Николаева уонна Мария Александровна Дьяконова ааҕарга, суруйарга үөрэтиэхтэрэ-такайыахтара, кинилэргэ иккис ийэ кэриэтэ буолуохтара.
Быйылгы үөрэх дьылыгар оскуолабытын 38 оҕо бүтэриэҕэ. Кинилэр бэйэлэрин баҕа санааларын кумааҕы сөмөлүөккэ тиһэннэр, оскуоланы аан маҥнай атыллыыр оҕолорго бэлэх быһыытынан туттардылар, биир тыынынан, биир хардыынан тэҥҥэ үҥкүүлээтилэр, дьону үөртүлэр.
Маҥнайгы чуорааны тыаһатар чиэс бэрилиннэ 1 «а» кылаас үөрэнээччитигэр Алиса Орлосоваҕа, 1 «б» кылаас үөрэнээччитигэр София Антоноваҕа, 1 «в» кылаас үөрэнээччитигэр Милена Федороваҕа, 11 «а» кылаас үөрэнээччитигэр Алексей Андреевка, 11 «б» кылаас үөрэнээччитигэр Арылхан Андросовка уонна 11 «в» кылаас үөрэнээччитигэр Денис Тимофеевка.
Биһиги оскуолабытыгар быйыл саҥа учууталлар, педагогтар үлэлии кэллилэр. Кинилэр кимнээхтэрий?
- Мирослава Владимировна Танасова, математика учуутала;
- Анисия Петровна Софронова, математика учуутала;
- Николай Григорьевич Иванов, педагог-организатор;
- Айыына Ильинична Винокурова, психолог;
- Лолита Александровна Петрова, социальнай педагог;
- Алена Анатольевна Мухоплева, логопед;
- Константин Викторович Алексеев, физкультура учуутала.
Быйылгы үөрэх дьыла барыбытыгар ситиһиилэрдээх, үрдүк дабайыылардаах уонна чыпчааллардаах буоллун!
Сиһилии видео-матырыйаалга көрүҥ:
Кирилл Иванов, Сэмэн Данилов аатынан Бэрдьигэстээх орто оскуолатын
«Сайдам» медиакиин эдэр кэрэспэдьиэнэ