Балаҕан ыйын 1 күнэ хас биирдии киһиэхэ — үөрүүлээх бырааһынньык! Маҥнайгы кылааска киирэр кырачааннарга уонна кинилэр төрөппүттэригэр ураты кэтэһиилээх, долгутуулаах күн буолар. Иннилэригэр билии-көрүү дьикти кэрэ эйгэтигэр тиэрдэр саҥа аартык арыллар.
Быйылгы үөрэх дьылыгар оскуолабыт кыһатыгар уопсайа 270 үөрэнээччи Билии аартыгын аанын арыйда. Маҥнайгы кылааска 31 үөрэнээччи киирдэ, оскуоланы 12 үөрэнээччи бутэрэн олох киэҥ аартыгар үктэниэҕэ.
Билии күнүнэн оҕолору уонна учууталлары П.И. Шадрин аатынан оскуола дириэктэрэ Калиста Федосьевна Афанасьева, Хаҥалас улууһун биир кэлим дьуһуурунай-диспетчерскай сулууспа начальнига Дьулустаан Михайлович Андреев, Хаҥалас улууһун үөрэх дьаһалтатын сүрүн исписэлииһэ Виктория Афанасьевна Васильева истиҥник эҕэрдэлээтилэр.
Билии күнүн үөрүүлээх бырааһынньыга бастыҥ ситиһиилээх оҕолор дойду былааҕын көтөҕүүлэриттэн саҕаланна. Былааҕы таһаарар чиэс сыл бастыҥ үөрэнээччилэригэр бэриллиннэ: үөрэх туйгунугар, “Инникигэ Хардыы” научнай-практическай кэмпириэнсийэ 1 истиэпэннээх дипломааныгар, саха тылын, литературатын олимпиадаларын кыайыылааҕар, “Үөлэн Хардааччы” олоҥхо сүрүн оруолун толорооччутугар Айсен Диодоровка (8 «А» кыл.), ох саанан ытыыга спорт маастарын кандидаатыгар (КМС), ох саанан ытыыга улуус, республика күрэхтэрин хас да төгүллээх кыайыылааҕар Нарияна Прудецкаҕа (9 кыл), улуу полилингвальнай оратордар күрэхтэрин 3 миэстэлээх кыайыылааҕар, региональнай «Профессионалы-2024” чемпионат муниципальнай этабын 2 миэстэлээх кыайыылааҕар, бүтүн Арассыыйатааҕы “Ларионовскай ааҕыы” 3 истиэпэннээх дипломааныгар Сардаана Гоголеваҕа (10 “А” кыл.), бүтүн Арассыыйа үрдүнэн ыытыллар «Наука, творчество, духовность” 1 истиэпэннээх дипломааныгар, өрөспүүбүлүкэтээҕи “Инникигэ Хардыы” научнай-практическай кэмпириэнсийэ 3 истиэпэннээх дипломааныгар, региональнай “Профессионалы” күрэх 2 миэстэлээх кыайыылааҕар, “Ай роботы” өрөспүүбүлүкэтээҕи күрэх кыайыылааҕар Матвей Слепцовка (10 “Б” кыл.), буулдьанан ытыыга бастакы разрядтаах өрөспүүбүлүкэ хамаандатын чилиэнигэр, региональнай «Профессионалы-2024” чемпионат муниципальнай этабын 3 миэстэлээх кыайыылааҕар Святослава Владимироваҕа (11 кыл.); өрөспүүбүлүкэтээҕи “Инникигэ Хардыы” научнай-практическай кэмпириэнсийэ лауреатыгар, бүтүн Арассыыйатааҕы “Ларионовскай ааҕыы” 3 истиэпэннээх дипломааныгар, өрөспүүбүлүкэтээҕи “Чугуновскай ааҕыы” кыайыылааҕар, «Профессионалы- 2024” күрэх призеругар Алина Жуковаҕа (11 кыл.), буулдьанан ытыыга спорт маастарын кандидаатыгар, “Манчаары” төрүт оонньуулар 22 спартакиадатын призеругар Татьяна Соловьеваҕа ( 11 кыл.).
Оскуолабытыгар быйылгы үөрэх дьылыгар саҥа үлэлии кэлбит Цеевтар эдэр дьиэ кэргэн педагогтары үөрэ көрүстүбүт. Николай Трофимович , история, обществознания учууталынан, София Сергеевна, психолог-педагогунан үлэлиэхтэрэ. Николай Трофимович: “Быйыл үөрэхпин бүтэрэн аан бастаан оскуолаҕа үлэлии кэллим. Быйылгы үөрэх дьылын саҥа саҕалыыр буолан долгуйа көрүстүм. Оскуолаҕа обществознания биридимиэтин эксээмэн туттарыыга талар оҕо ахсаана сылтан сыл аайы элбээн иһэр, ол иһин быйылгы сылга күүскэ үлэлээн үчүгэй түмүктэри көрдөрүөҕүм диэн эрэнэбин».
Билим уонна методика өттүнэн дириэктэри солбуйааччы Елена Семеновна Артемьева:
Саҥа үөрэх дьыла үгэс быһыытынан улахан суолталаах уларыйыылары кытта тэҥҥэ хаамар. Үөрэх чааһыгар обществознание биридимиэтин оннугар 6-7 кылаастарга кыраай историятын үөрэтиигэ бэриллэр. Итини тэҥэ, оскуолабытыгар предпрофильнай кылаастар арылыннылар, оҕолор естественнэй-научнай хайысхалаах биридимиэттэри дириҥэтэн үөрэтиэхтэрэ
— диэн быйылгы үөрэх сылыгар уларыйыылар киирбиттэрин билсиһиннэрдэ.
Бүтүн Арассыыйатааҕы аахсыйа чэрчитинэн «Самолетики будущего» выпускниктарбыт сөмөлүөт оҥороннор уонна баҕа санааларын суруйаннар кырачаан үөрэнээччилэргэ туттардылар.
Көмүс дуйунан күлүмнүү киэркэйбит күһүҥҥү үтүөкэн күҥҥэ саҥа үөрэх сылын арыйар маҥнайгы чуораан лыҥкыначчы тыаһаан Билии аартыгын арыйда.
«Куйаар долгуна» Өктөм орто оскуолатын медиа киинэ