Бүгүн, балаҕан ыйын 3 күнүгэр, Саха Өрөспүүбүлүкэтин Иван Николаевич Егоров – Горнай аатынан көрбөттөр уонна мөлтөхтүк көрөр дьон анал библиотеката Аан дойду иккис уоттаах сэриитэ түмүктэммитин бэлиэтиир тэрээһин чэрчитинэн “Война. Победа. Память!” кинигэ быыстапкатын тэрийэн ыытта.
“Война. Победа. Память!” кинигэ быыстапката Аҕа дойду Улуу сэриитин уоттаах кыргыһыыларыгар, фроҥҥа сэриилэспит, тыылга үлэлээбит дьон хорсун быһыыларыгар анаммыт литератураны кытта билиһиннэрэр сыаллаах-соруктаах.
Библиотека көрбөт дьоҥҥо туһуламмыт буолан, бүгүҥҥү быыстапкаҕа кинигэ араас барыйаана киирдэ. Ол курдук анал брайль шрибинэн таҥыллыбыт Лэгэнтэй Тыын Харбас “Солдаты-охотники”, Уйбаан Нуолур “Саллаат оҕото Чооруона”, бөдөҥ шрибинэн суруллубут Анатолий Ананьев “Танки идут ромбом” кинигэлэрэ, ону таһынан, хас даҕаны айымньы түмүллэ сылдьар флэш-карталара турдулар. Бу флэш-картаны доруобуйаларынан хааччахтаах дьон анал проекторынан истэллэр. Быыстапкаҕа Константин Симонов “Живые и мертвые. Книга третья. Последнее лето” трилогията аудиокинигэнэн уонна “Битва за Севастополь” анал тифлокомментарийдаах уонна нууччалыы субтитрдаах көрбөт уонна истибэт дьоҥҥо аналлаах киинэ киирдилэр. Маны таһынан, сахалыы уонна нууччалыы тылынан көннөрү кинигэлэр эмиэ тураллар.
Аҕа дойду Улуу сэриитин туһунан кинигэлэр ол алдьархайдаах кэми хас биирдии ааҕааччыга бэйэтин этинэн-хаанынан билэригэр, эйэлээх олох иһин сэриилэспит эһэлэрбитин, дьоруойдуу охтубут дьону өйдүү-саныы сылдьарыгар кыах биэрэллэр.
keskil14.ru